Azken orduotan, Martxoaren 8an iragarri zuten zaintza eskubide kolektiboaren aldeko greba feminista orokorrari eguna jarri diote; azaroaren 30ean izango da. Hain zuzen, egun horri begira antolatu dute Euskal Herriko Neska* Gazteek Baterajotzea ekimena Usurbilen, urriaren 13tik 15era.
"Utopiak lehertzeraino, neska* gazteok baterajotzera!" deitu zituzten apirilean Mikel Laboa plazan egin zuten jendaurreko lehen aurkezpenean. "Sistema kapitalista zisheteropatriarkala iraultzeko proposamenak irudikatu eta artikulatzera, hausturak kolektiboki antolatzera eta utopiak lehertzera gatoz", iragarri zuten.
Ekimen hau, greba feminista orokorrari begirakoa ere izango da. "Gazteok beharrezko dugu antolaketa propio bat ere, gure behar eta proposamenek tokia izan dezaten, mundu ikuskera zabaldu dezagun eta iritzi sortzaile izan gaitezen. Indartsu gaude eta espazio propioak behar ditugu. Horregatik, grebaren aurretik Euskal Herriko gazte feministontzat espazio bat sortuko dugu, Baterajotze berri batera goaz".
Greba horren testuinguruan ziotenez, "azken urteetan, mugimendu feministatik mobilizazio gaitasun ikaragarria erakutsi dugu. Antolatzen gabiltzan greba honek izango duen potentzialtasunaz eta eztanda gaitasunaz baliatuko gara errotiko aldaketak eragin eta exijitzeko; urgentziazkoak diren aldaketak abiarazteko; arrakalak sortu eta eraldaketetan sakontzen joateko aurrebaldintzak sortzeko; gure utopia propioak hemen eta orain gaurdanik eraikitzeko. Ezkutatu egin nahi dute, baina askotan diogun bezala, gerra egon badago. Gerra hau ikusaraztera gatoz, iraultza feminista da gurea!".
Izen-ematea eta herri aurkezpena
Euskal Herriko Neska* Gazteek urriaren 13tik 15era Usurbilen antolatu duten Baterajotzerako izen-ematea zabalik dute. Inskripzioak ehkoneskagazteak.eus atarian bideratu beharko dira.
Ekimenaren nondik norakoen berri emateko, bestalde, herri mailako aurkezpena iragarri dute datorren uztailaren 14an, arratsaldeko 19:30etan Mikel Laboa plazan.
Hemen Bateraterajotzea ekimenaren aurkezpenean antolatzaileen plazaratu zuten adierazpena osorik:
Euskal Herriko neska* gazteen agerraldia Usurbilen
Neska* gazteok sistema hau iraultzeko antolatuta gaudela ozen esatera gatoz. Azken urteotan, krisi anizkoitzaren erpinetako bakoitza zorroztu da eta bizitza eta kapitalaren arteko talka bortizki areagotu. Murrizketen, bizitzaren garestitzearen, eraso sexista, arrazista, klasista eta transmaribollo-foboen nahiz bizitza duin bat izateko oinarrizkoenak diren baliabideen faltaren lekuko gara. Sistemaren oldarraldi berri bat da hau eta distopia baten aurrean kokatzen gaitu.
Oldarraldi honetan, zaintza lanen pribatizazio eta merkantilizazioan sakondu dute, eskubidea izatetik urrun, pobrezia eta betebehar gisa inposatzen digutelarik sistematikoki, enpresek, erakunde publikoek eta gizonek. Modu disparekoan, doakoan edo prekarizatuan behartuta egiten ditugu; finean, esplotatuta. Horregatik diogu, zaintza lanen esparrua, esplotazio eremu sexualizatu eta arrazializatua dela. Esplotazio egoeran inposatzen diren zaintza-lanei planto egingo diegu.
Zaintza lanen pribatizazio eta merkantilizazioa ezinbesteko zaizkie botere kapitalista, patriarkal eta kolonialei, biziraun dezaten. Izan ere, gure gorputzen esplotazioari esker, produzitu eta erreproduzitzen da sistema kapitalista zisheteropatriarkal koloniala.
Zaintza lan gisa ukatzea eta inbisibilizatzea, sistemaren ezinbesteko premisa da; horregatik diogu egungo zaintza-sistema iraultzearen proposamenak, potentzial politiko izugarria duela, bestelako sistema bat irudikatzera eta antolatzera garamatzalako.
Mugimendu feministatik, zaintza-sistema iraultzearen proposamen erradikala mahaigaineratu dugu, greba feminista orokor baterako deia eginez, zaintza eskubidea izatea eta lan honen gaineko erabaki gaitasun kolektiboa edukitzea exijituz.
Azken urteetan, mugimendu feministatik mobilizazio gaitasun ikaragarria erakutsi dugu. Antolatzen gabiltzan greba honek izango duen potentzialtasunaz eta eztanda gaitasunaz baliatuko gara errotiko aldaketak eragin eta exijitzeko; urgentziazkoak diren aldaketak abiarazteko; arrakalak sortu eta eraldaketetan sakontzen joateko aurrebaldintzak sortzeko; gure utopia propioak hemen eta orain gaurdanik eraikitzeko. Ezkutatu egin nahi dute, baina askotan diogun bezala, gerra egon badago. Gerra hau ikusaraztera gatoz, iraultza feminista da gurea!
Jada hasi gara grebaren antolaketan auzo eta herrietan. Ordea, jakin badakigu, gazteok beharrezko dugula antolaketa propio bat ere, gure behar eta proposamenek tokia izan dezaten, mundu ikuskera zabaldu dezagun eta iritzi sortzaile izan gaitezen.
Indartsu gaude eta espazio propioak behar ditugu. Horregatik, grebaren aurretik Euskal Herriko gazte feministontzat espazio bat sortuko dugu, Baterajotze berri batera goaz. Dugun potentzialtasuna artikulatu, norabidetu eta nola kristalizatu erabakitzeko Usurbilen elkartuko gara urriaren 13, 14 eta 15ean.
Milaka gara auzo eta herrietan lanean gauden neska* gazteak, zaintza politizatzen ari garenak, gure gorputzak zeharkatzen dituzten zapalkuntza egoerei izena jartzen diegunak, hirigintza gure bizitzen neurrira diseinatuta ez dagoela salatzen gabiltzanak, hezkuntza-sistema patriarkarla dela salatzen dugunak, bestelako harremantze ereduak imajinatzen eta praktikan jartzen ari garenak, autodefentsa feministan gorputza jartzen dugunak... Finean, beste mundu bat posible dela sinetsi eta hau eraikitzeko borrokan gaudenak. Baliatu dezagun potentzialtasun hau utopiak gaurdanik eraikitzen hasteko, eta horretara bidean, Greba Orokor Feminista inoizko indartsuena izan dadin.
Sistema kapitalista zisheteropatriarkala iraultzeko proposamenak irudikatu eta artikulatzera, hausturak kolektiboki antolatzera eta utopiak lehertzera gatoz.
Euskal Herriko neska* gazteok indarberriturik gaude, iraultza feminista da gurea.
Utopiak lehertzeraino, Neska* Gazteok Baterajotzera!
Gora borroka feminista!
Azaroaren 30erako iragarri berri duten greba feminista orokorrari begira, Euskal Herriko Neska* Gazteen Baterajotzea egingo da urriaren 13tik 15era Usurbilen. Apirilean Mikel Laboa plazan aurkeztu zuten ekimenari lotutako bi ohar jakinarazi dituzte; Baterajotzerako izen-ematea zabalik dute, eta herri mailako aurkezpena antolatu dute uztailaren 14rako.