Usurbilgoen ostean, datozen jaiak ate joka

Noaua Aldizkaria 2023ko uzt. 12a, 12:16

Usurbilgo jaien ostean, Zubieta, Urdaiaga eta Atxegalde izango dira festa giroan murgiltzen hurrengoak.

Igaro dira herriko festak, baina inguruotako jaien denboraldia hasi baino ez da egin. Kalezarko eta Usurbilgo ospakizunen ondotik, egunerokotasuna hautsi eta parranda giro betean murgiltzen hurrengoak Zubieta, Urdaiga eta Atxegalde izango dira udako hilabeteotan. 

Toki hauetako guztietako Jai Batzordeak lanean ari dira azken hilabeteotan bertako festen nondik norako guztiak prestatzeko lanetan; besteak beste, dagoeneko azken ukituak ematen egitarauari. 

Zubieta
Usurbilgo festen lekukoa hartzen lehena Zubieta izango da; uztailaren 24tik 31ra ospatuko dituzte jaiak. Ohi bezala hainbat otorduetan parte hartzeko aukera izango da, haurrei zuzenduriko ekimenak, gaupasa eguna uztailaren 30etik 31ra, kontzertu gau gehiago baita noski, bertako kirolarien erakustaldiak, oilasko biltzaileak... Hori eta gehiago, astebeteko ospakizunotan.

Urdaiaga
Zubietakoak amaituta, pare bat eguneko atsedenaldia baino ez da egongo. Lau festa egun izango dituzte Xanistebanek. Abuztuaren 3an hasiko dituzte jaiak eta hilaren 6ra arte luzatuko dira. Hemen ere, haurrei zuzendutako ekimenak tartekatuko dira, Orbeldikoen emanaldia, herri afaria, bertso saioa eta kontzertu gauak.

Atxegalde
Abuztuan Urdaiagan hasi festetan eta Atxegalden amaituko da hilabetea, hemen ere parranda giro betean. Abuztuko azken asteburuan auzo honetan jai izango dute, hilaren 25ean hasi eta 27ra arte. 48 orduko etengabeko ospakizunotan, haurrentzako ekimenak, kontzertuak eta txapelketak tartekatuko dituzte egitarauan.

Xehetasun gehiago, datozen egunotan.