Posta bidez bozkatzeko azken egunak

Espainiako Gorteak, Madrilgo Diputatuen Kongresua eta Senatua berritzeko deituak dauden hauteskundeen astean gara jada. Igande honetan, uztailaren 23an izango dira. Egun horretan bozkatu ordez, aurrez posta bidez botoa emateko eskaera egin duzuenok, gogoan izan; ostegunera arte, hilaren 20a baino lehen bideratu beharko duzue botoa Correoseko bulegoan. 

Jada modalitate honetan botoa emateko eskabiderik ezin da egin, iragan uztailaren 13an itxi zuten tramiteok bideratzeko epea.

Egutegia
Uztailak 4-20: aurrez hala eskatu dutenek, posta bidez bozkatzeko aukera Correosen. Nortasun agiria aurkeztu beharko da.
Uztailak 7-21: hauteskunde kanpaina.
Uztailak 22: hausnarketarako eguna.
Uztailak 23: bozketa eguna, 9:00-20:00 artean.

Hauteslekuak
Ohi bezala, uztailaren 23an, goizeko 9:00etan hasi eta arratsaldeko 20:00ak arte zabalik izango dira hautesleku guztiok. Maiatzaren 28koekin alderatuta, aldaketarik ez. Udarregi ikastolan hiru mahai egokituko dituzte, bi Kalezarko Haur Eskolan, hautesleku bana Aginagako Eskolan eta Santuenea Elkartearen egoitzan. Azkena, Zubietako Lanbide Eskolan, Usurbil aldean bizi diren zubietarrentzat. Donostia aldean bizi direnek, bertako eskola txikira joan beharko dute.