Alarma gorria piztu duen aste honetako beroaldiaren ondotik, datozen orduotan euria gogotik egingo duela iragarri du Euskalmet meteorologia agentziak. Hain zuzen, prezipitazio handiagatik abisu horian egongo gara larunbat arratsaldeko 18:00etan hasi eta igande eguerdiko 12:00ak arte. "Ordubetean 15 l/m² baino gehiago pila litezke Kantauri isurialdeko zenbait tokitan, bereziki kostaldean", ohartarazi du Euskalmet-ek. Are gehiago, "gaur, larunbata, 18etatik bihar, igandea, 12ak arte Kantauri isurialdeko zenbait lekutan 30 l/m² baino gehiago pila litezke, bereziki ekialdean".
Giro honekin, larunbat honetan, abuztuaren 26an Usurbilen, "goibel egongo da eta zaparrada batzuk botako ditu, batez ere amaieran. Ipar-mendebaldeko haizea ibiliko da. Tenperatura gutxi edo nahikoa jaitsiko da". Bihar, hilaren 27an, "zerua hodeitsu egongo da eta zaparradak sarri botako ditu. Ekaitzak jo dezake noizbehinka. Ipar-haizea, bolada gogorrekin. Tenperatura gutxi jaitsiko da".
Astelehenerako ez da aldaketa handiegirik espero. "Zerua oso hodeitsu egongo da eta zaparradak sarri botako ditu. Mendebal/ipar-mendebaldeko haizea ibiliko da, bolada gogorrekin. Tenperaturan aldaketarik ez edo gutxi igoko da", Euskalmet-en arabera.
Informazio eguneratua, euskalmet.eus atarian.
Larunbat arratsaldeko 18:00etan hasi eta igande eguerdiko 12:00ak arte metro karratuko 30 litro baino gehiago pila daitezke zenbait lekutan.