"Aline" izeneko denboralea datorkigu datozen orduotan, haize bolada gogorrekin gainera. Ostegun gauerdi honetan hasi eta ostiral arratsaldeko 18:00ak arte abisu edo alertaren baten eraginpean izango gara; abisu horian hain zuzen, denbora tarte horretan guztian zehar. "Mendebal-osagaiko haize-boladek 100 km/h-ko abiadura gaindi dezake haizeguneetan. Egunaren lehen partean hego-mendebaldeko haizea nagusituko da eta bolada gogorrenak mendi inguruetan izango dira. Arratsaldean mendebal/ipar-mendebaldeko haizea nagusituko da eta orduan bolada gogorrenak kostaldean neurtuko dira".
Haizeguneak ez diren tokietan, aldiz, abisu horian izango dira 6:00-15:00 artean. "Mendebal-osagaiko haize-boladek 80 km/h-ko abiadura gaindi dezake haizeguneak ez diren lekutan. Goizean hego-mendebaldeko haizea nagusituko da eta bolada gogorrenak barnealdean izango dira. Eguerdi partean haizeak mendebal/ipar-mendebaldera egingo du eta orduan bolada gogorrenak kostaldetik gertuen dauden lekuetan neurtuko dira".
Euria ere bai
Adi, ordea, ostiral goizeko 10:00etan hasi eta arratsaldeko 15:00ak arte haizeguneetan alerta laranja ezarri dute. "Mendebaldeko haize-boladek 110-120 km/h-ko abiadura gaindi dezake haizeguneetan, bereziki kostaldeko lekurik haizetsuenetan eta itsasoan".
Giro honekin, ostegun honetan, urriaren 19an Usurbilen, "zerua oso hodeitsu egongo da; egunaren erdialdeko orduetan ostarteak irekiko dira. Euri txikia egin dezake, bereziki egunaren bigarren partean eta orduan zenbait lekutan ertaina izan daiteke. Hego-osagaiko haize ahul-bizia ibiliko da, bolada gogorrekin eta oso gogorrekin. Tenperatura gutxi jaitsiko da".
Bihar, hilak 20, "zerua oso hodeitsu egongo da. Euri txiki-ertaina egingo du. Mendebal-osagaiko haize ahul-bizia ibiliko da, bolada gogorrekin eta oso gogorrekin. Tenperatura jaitsi egingo da: gutxi edo nahikoa minimoak eta nabarmen edo asko maximoak".
Etzi, larunbata, "zerua hodeitsu edo oso hodeitsu egongo da. Zaparrada txikiak botako ditu, zenbait lekutan ertainak. Mendebal-osagaiko haize ahul-bizia ibiliko da, arratsaldean ipar-mendebaldeko nagusi izanik; egunaren lehen partean haize-bolada gogorrak izango dira. Tenperatura minimoak gutxi jaitsiko dira eta maximoetan aldaketarik ez".
Informazio gehiago, euskalmet.eus atarian.
Ostiralean haizeguneetan 10:00-15:00 artean alerta laranjan izango direla ohartarazi du Euskalmet meteorologia agentziak. Orduko 120 kilometrotik gorako haize boladak izan ditzakegu.