Errepidea kudeatzeko ardura Foru Aldundiarena da. Duela urte batzuk, herri ekimen bati esker, Troiako pasabideko semaforoa jarri zuten. Horrek asko hobetu zuen pasabideko erabiltzaileen segurtasuna. Gaur egun itzalita dago semaforoa eta arrazoia ez dago argi.
Usurbil eta Zubieta arteko igarobide honetatik herritar asko igaro ohi dira. Oinezkoak, txirrindulariak, korrikalariak... Fluxu handiko gunea da eta bere arriskua du, N-634 errepidea eta kostaldeko tren pasabidea zeharkatzeko balio duelako. Azken egunotan baina, semaforoa itzalita dago eta horrek are arriskutsuago egiten du egoera. Gaur bezalako behelainoarekin, zer esanik ez.