23. Korrika badator! Euskararen aldeko lasterketarekin bat egiteko unea hurbiltzen ari da. AEK pixkanaka aurreratzen doa xehetasunak. Izan ere, ostegun goiz honetan ezagutarazi dute datorren edizioa nondik eta noiz igaroko den, "Harro Herri" aldarripean. Adi, 22. Korrikaren antzera, datorrena ere gauez helduko da gure artera, baina kontrako noranzkoan. 2022ko apirilaren 8an Aginagatik Zubietara zeharkatu zuen udalerri hau. Alderantzizko bidea egingo du oraingoan; Zubietan hartuko du herri honek Lasarte-Oriak utzitako lekukoa eta Aginagako Mapilen oriotarrei helaraziko die.
23. Korrika martxoaren 19an izango dugu gure artean, gauez aipatu moduan, asteartearekin; 22:53 aldera. Mezu sekretua barnean goxo asko eramango duen lekukoa ordubete inguruz izango dugu bertako kale eta bideetan barrena. Izan ere, gauerdian, 23:57 aldera oriotarren esku utzi beharko du Usurbilek.
Hamar kilometro
22:53-22:57 artean, beraz, euskararen aldeko lasterketa entzutetsuak Zubieta, Santuenea, Kalezar, Kaxkoa, Atxegalde ingurua eta Aginaga zeharkatuko ditu. Guztira, hamar kilometroko ibilbidea osatuko du 23. Korrikak geure artean; lehenengo lau kilometroak Zubietako lurretan barrena egingo ditu, bosgarrena Santuenean, seigarrena Kalezarren. Zazpigarren kilometroan Puntapax ingurura helduko da Korrika. Azkeneko hiru kilometroak N634 errepidetik barrena egingo ditu; hasi Atxegalde paretik eta Aginagako Mapileraino. Hauek 23. Korrikak udalerri honetan egingo dituen hamar kilometroak. Lekukoa hartuko dutenak, ordea, gehiago izan daitezke. Izan ere, kilometro osoa edota erdia erreserbatzen dituzte hainbat eragileek. Edota bide zati bera, elkarte, erakunde edota koadrila batek baino gehiagok eskuratzen dute. Hori aurrerago argituko du Usurbilgo Korrika Batzordeak.
Bitxikeriak
Bitxikeria moduan, udalerri honi dagokionez, Usurbil izango da Korrika egunotako bati amaiera emango dion udalerria. Izan ere, aipatu moduan, martxoaren 19an helduko da, gauez; gauerdian utziko dio lekukoa Oriori. Bigarren bitxikeria badu baita hitzordu honek; gutxi gorabehera, ibilbidearen lehen erdia eginda hartuko du lekukoa udalerri honek. 2793 kilometroko bidean, 1365-1375 kilometro arteko bide zatia Usurbilena izango da martxoaren 19ko gauean.
Informazio gehiago, korrika.eus atarian.
23. Korrika Usurbildik martxoaren 19an
| Ordua | Kilometroa | Tokia |
| 22:53:38 | 1365 | Zubietako hipodromo etorbideko zubia |
| 22:57:04 | 1366 | Irigoien, 34 (Zubieta) |
| 23:03:34 | 1367 | Learritza pasealekua, 23 (Zubieta) |
| 23:10:04 | 1368 | Learritza pasealekua, 23 – Amiri (Zubieta) |
| 23:16:34 | 1369 | Santuenea, 37 |
| 23:23:04 | 1370 | Belmonte, 1 (Kalezar) |
| 23:29:34 | 1371 | Puntapax, 24 (Artzabal) |
| 23:36:04 | 1372 | N-634- 4 |
| 23:42:34 | 1373 | N.634-5 |
| 23:49:43 | 1374 | Aginaga, 12 |
| 23:57:31 | 1375 | N-634 KM- 8, Aginagako Mapil baserriaren aurrean (Hemen Oriok hartuko du lekukoa) |
