Euri-jasak, haizea, hotza... Egokitzen den moduan, negu giro betean gara egunotan. Asteburuan berdintsu segiko dugu. Izan ere, Euskalmet meteorologia agentziak ohartarazi duenez, larunbat goizaldeko 6:00etan hasi eta eguerdira arte haizeagatik abisu horiaren eraginpean izango gara. "Haizeguneetan hego-mendebaldeko haize-boladek 100 km/h-ko abiadura gaindi dezakete. Bestalde, haizeguneak ez diren lekuetan hego-mendebaldeko haize-boladak 70-80 km/h ingurukoak izango dira", aipatu meteorologia agentziaren arabera.
Haizeari lotutako abisu horia bertan behera utziko duten ordu berean aktibatuko dute elurrari lotutakoa, larunbat eguerdiko 12:00etan hasi eta 24 orduz, igande eguerdiko 12:00ak arte. Euskalmet-ek iragarritakoaren arabera, larunbat goizean 1200-1300 metro inguruan zuritu dezake, baina orduek aurrera egin ahala ziztu bizian beherago zuritu dezake. Hala, larunbat arratsaldean, 600-900 metro artean zuritu dezake. "Arratsalde-gauean zaparrada trumoitsuak eta txingorra bota ditzake", ohartarazi du Euskalmet-ek. 600 metrotan 3 zentimetroko lodiera har dezake elurrak.
Igande goizaldean, gainera, noizbehinka 500 metrotan ere zuritu dezakeela iragarri dute. Honenbestez, Andatza gainean ere elurra egin dezake. "Goizaldean trumoi-ekaitzak izan daitezke eta txingorra bota dezake", gaineratu du Euskalmet-ek. Igande goizetik aurrera, elurra gora egingo du. Egunean zehar, "euri txiki-ertaina egingo du, bereziki Kantauri isurialdean; gauean atertzera egingo du".
Negu giroko asteburua
Testuinguru honetan, ostiral honetan, martxoaren lehenean Usurbilen, "goizean zerua tarteka hodeitsu egongo da; egunaren bigarren partean hodeiak ugaritu egingo dira eta zerua oso hodeitsu geratuko da. Arratsalde-gauean euri txikia egingo du, ertaina izan daiteke. Mendebal-osagaiko haize ahul-bizia ibiliko da, bolada gogorrekin eta oso gogor batzuekin; goizean hego-mendebaldekoa nagusituko da. Tenperatura maximoetan aldaketarik ez".
Larunbatean, "zerua oso hodeitsu egongo da. Prezipitazio txiki-ertaina egingo du, bereziki egunaren bigarren partean. Arratsalde-gauean trumoi-ekaitzak izan daitezke eta txingorra egin dezake. Hego-mendebaldeko haize ahul-bizia ibiliko da, bolada gogorrekin eta oso gogorrekin. Arratsaldean haizeak mendebal/ipar-mendebaldera egingo du, bolada gogorrekin eta oso gogorrekin. Tenperatura minimoak gutxi edo nahikoa igoko dira; egunaren amaieran neurtuko dira. Tenperatura maximoak gutxi jaitsiko dira".
Igandean, "zerua hodeitsu edo oso hodeitsu egongo da; arratsalde-gauean hodeiak gutxitu egingo dira. Zaparrada txiki-ertainak botako ditu; arratsaldean atertzera egingo du. Goizaldean trumoi-ekaitzak izan daitezke eta txingorra bota dezake. Mendebal-osagaiko haize ahul-bizia ibiliko da, bolada gogorrekin; arratsaldean baretu eta aldakor ibiliko da, eta gauean hego-osagaia nagusituko da. Tenperatura gutxi jaitsiko da".
Informazio eguneratua, euskalmet.eus atarian jaso ahalko duzue.
Haizeagatik eta Andatza gaina zuritu dezakeen elurragatik, abisu horian asteburuan
Negu giro beteko asteburua datorkigula ohartarazi du Euskalmet meteorologia agentziak.