Berriki Liburuaren Nazioarteko Egunaren harira, Aginagako eskolakoekin egon ostean, Sutegi udal liburutegiak asteazken honetarako, maiatzaren 8rako, antolaturiko irakurketa solasaldia eskainiko du Yolanda Arrietak. Mariasun Landaren “Galtzerdi suizida” liburua hartuko dute ahotan, LH6ko gazteei zuzendua egongo den saioan.
Honatx liburutegian bertan eskura daitekeen liburuari buruzko zenbait xehetasun. "Galtzerdi bat delako protagonista nagusia darama liburuak hain izenburu bitxia, edonori jakin-mina pizten diona. Izan ere, galtzerdi baten ahotan jarri ditu egileak edonork izan ditzakegun zalantzak eta burutazioak, senti dezakegun bakardadea edo maitasuna, etsipena edo bizi-poza... Fikziozko kontakizuna izan arren, gizakion eguneroko errealitatea islatzen du obra honek. Galtzerdi ausart batek lehenengo pertsonan kontatuko digu bere burua laugarren solairutik bota zuenetik maitasunaren kilimak sentitu zituen unerainoko gorabehera guztiak. Abentura eta erreflexioz betetako liburua delako da egokia nahiz gazte eta nahiz helduentzat. Eta ezin da aipatu gabe utzi Antton Olariagak liburu honetan egindako lana. Mariasunen testuari etxe eder bat egin dio arkitekto handi honek".
Liburutegiko datozen deialdiak
Maiatzak 8, asteazkena
18:00 Irakurketa solasaldia LH6ko gaztetxoentzat, Yolanda Arrietaren eskutik. Mariasun Landaren “Galtzerdi suizida” liburua hartuko dute ahotan. Aleak eskuragarri liburutegian.
Maiatzak 15, asteazkena
19:00 Idoia Torregarai Martija herrikidearen “Mikroipuinak” liburuaren aurkezpena.
Antolatzailea: Sutegi udal liburutegia.