Alderdi jeltzalearen esanetan, hobekuntza horiek egiteko 12.000 euroko inbertsioa egin beharko litzateke. “Horri esker, oinezkoentzako ibilbide segurua gauzatu ahal izango da, EAJ-PNVk udalerriko bide-segurtasunarekin eta irisgarritasun unibertsalarekin duen konpromisoa azpimarratuz”.
Proposamena ez da berria. 2024ko udal aurrekontuak zuzenketa garaian zeudenean, EAJ-PNVk orduantxe luzatu zuen lan honen beharra, “baina EH Bilduren udal gobernuak ez zuen onartu”, prentsa-ohar bidez gogora ekarri duenez.
Segurtasuna eta irisgarritasuna bermatzea helburu
“Espaloirik eta zebra-biderik gabeko errepidea izanik, haur askok autobusa hartzeko gurutzatzen dutenean, arrisku-egoera ugaritu egiten dela" dio Xabier Otxoak, Usurbilgo EAJ-PNVren bozeramaileak. "Proposamen hau Usurbil seguruago eta guztiontzako eskuragarriago bat lortzeko aurrerapausoa da. Sentitzen dugu 2024ko aurrekontuetan sartu ez izana, baina lanean jarraitzen dugu, eta gure bizilagunen bizi-kalitatea hobetuko duten proiektuak defendatzen. Segurtasuna eta irisgarritasuna gure udalerrian bermatu beharreko oinarrizko eskubideak dira".