Metrokoadroka Sormen Laborategiak "Artxibo biluzia" izeneko proiektua garatu du, Joan Mari Torrealdai beka deialdiaren baitan. Askotariko formatuak uztartu ditu, izan ere, antzezlan, ikastaro eta dokumentu fisiko baten forma hartu du egitasmoak, egileek beraiek Zumarteko agerraldian azaldu zutenez. Dokumentuari dagokionean, izenari eta izanari gorazarre eginez, artxibo itxurakoa da. Barruan bost liburuxka ditu: Metrokoadrokakoek proiektuak osatzeko eginiko gogoetak, Maria Elorzaren dokumentala, Danele Sarriugarteren egunerokoa, proiektuarekin berri soilik gutun bidez jasotako informazioa oinarri hartuta Nagore Legarretak eginiko argazki bilduma, eta azkenik, urte hasieran Sutegin estreinaturiko antzezlanean publikoak eginiko ekarpenak jasotzen ditu.
Izan ere, ikus-entzuleei galdetu zitzaien idatzi eta egileei helaraztea, ze istorio nahiko luketen historiara pasatzea. "Emanaldietako erantzunak biltzen ditu azken liburuxkak", azaldu zuen Zumarteko agerraldian, aipatu sormen laborategiko kide Idoia Beratarbidek. Lan hau koordinatu dutenak hain zuzen, Metrokoadrokako kideak izan dira.
"Artxibo biluzia" lan honen 400 ale argitaratu ditu Udalak. Herriko liburu-dendetan eskuratu ahalko dituzue 20 eurotan, edota baita 17 eurotan Berriako nahiz NOAUA! K.E.-ren bazkideek. NOAUA!-koen kasuan, eskariak 943 360 321 telefono zenbaki bidez edo elkartea@noaua.eus helbidera idatzita egin daitezke.
"Euskal kultura azterketa gaur"
"Artxibo biluzia" izan da Joan Mari Torrealdai beka deialdiaren estreinako edizioaren baitan garatu den proiektua. Bigarren edizioa martxan dute jada haren sustatzaile Jakin Fundazioak eta Usurbilgo Udalak. Gogoan izan, "Joan Mari Torrealdai Beka kultur ikerketak eta egitasmoak sustatzeko sortu da, bereziki Joan Mari Torrealdaik jorratu izan dituen esparru nagusietan".
Datorren edizioko gaia, "euskal kultura azterketa gaur" izango da. Joan Mari Torrealdaik duela ia mende erdi hasitako liburugintza azterketa berrikustea eta azterketa eredua beste arloetara zabaltzea izango du helburu. Dagoeneko proiektuak aurkezteko epea zabalik duzue datorren urriaren 21era arte. Honatx deialdi honetan parte hartzeko antolatzaileek plazaratu dituzten oinarrien berri:
2. Joan Mari Torrealdai beka
Beka deialdiaren xedea: kultur ikerketak eta egitasmoak sustatzea, bereziki Joan Mari Torrealdaik jorratutako esparru nagusietan.
Gaia: "Euskal kultura azterketa gaur".
Ikerlanaren helburuak: Joan Mari Torrealdaik duela ia 50 urte hasitako liburugintza azterketa berrikustea eta azterketa eredua beste arloetara zabaltzea.
Ikerlanaren ezaugarriak: gehienez 12.000 karaktereko luzera izan eta euskaraz idatzi beharko da. Proiektuak atalok izan beharko ditu:
-Izenburua.
-Lanaren ikerketa esparrua eta helburua.
-Eskatzaileak edo eskatzaile-taldeak gaiarekin duen harremana eta motibazioa.
-Aurrekariak eta gaiaren gaur egungo egoera.
-Materialak, baliabideak eta lan metodologia.
-Lana garatzeko kronograma.
-Aurreikusitako emaitza, euskarria eta dibulgazio asmoak.
Aurkezpena: banaka edo taldean aurkez daitezke lanak jmtbeka@jakin.eus helbidean. Bi dokumentu aurkeztu beharko dira: batetik, eskatzailearen datuak (izen-abizenak, helbidea, e-maila, telefonoa, proiektuaren izenburua), eta, bestetik, izengabea izango den ikerketa-proiektua.
Beka deialdiaren irabazlea: 14.000 euro jasoko ditu lana egiteko (kopuruaren erdia izendatutakoan eta bestea ikerketaren emaitza entregatu eta epaimahaikideek onespena emandakoan). Azaroa amaieran ezagutaraziko duten irabazleak izendapena jaso eta 18 hilabeteko epea izango du lanaren emaitza antolatzaileei helarazteko.
Epaimahaia: deitzaileek hautatutako bost adituk osatuko dute. Honako hauek: Haritz Azurmendik, Maialen Akizuk, Ibai Iztuetak, Ainara Lasak eta Edu Apodakak. Baloraziorako irizpideok erabiliko dituzte:
-Proiektuaren originaltasuna, erakargarritasuna.
-Ikerketak gizartean izan dezakeen eragina eta interes soziala.
-Proiektuaren egingarritasuna.
-Zehaztasun eta egokitasun maila.
-Proiektuak genero-berdintasuna sustatzea.
Oharrak:
-Emaitza dibulgazioari begirakoa izango da eta garrantzi berezia emango zaio lana gizarteratzeko egokitzeari.
-Gogoeten eta ikerketen emaitzak askotariko formak izan ditzake: liburua, ikus-entzunezkoa, webgunea, erakusketa...
-Antolatzaileek bere gain hartuko dute proiektuaren gizarteratzea.
-Erreferentzia gisa, Torrealdairen obra osoa digitalizatua du jakin.eus atariak.
-Dirulaguntza jasotako lanaren jabetza intelektuala egilearena izango da. Bekatik erator litekeen euskarriaren jabetza antolatzaileena izango da, eta egile eskubideak ohiko moduan ordainduko dizkiote egileari, euskarriaren nolakotasunari dagokionaren arabera.
Eskaerak bidaltzeko epea: 2024ko urriak 21 (erabakia hilabetera jakinaraziko du epaimahaiak).
Informazio gehiagorako: jakin.eus
Sustatzaileak: Jakin Fundazioa eta Usurbilgo Udala.