Usurbilgo Udaletik jakinarazi dutenez, berriz irekiko dute abuztu hasieran plazaraturiko lan deialdi batean izena emateko epea. Izan ere, abuztuaren 5eko Gipuzkoako Aldizkari Ofizialaren bidez "C2 mailako operario laguntzaile (elektrikari laguntzailea) poltsa bat oposizio sistema bidez sortzeko" deialdiaren oinarriak kaleratu zituen Udalak. Baina zenbait akats antzeman dituzte. Horiek zuzendu eta deialdi horretan berriz izena emateko epealdia zabaltzea erabaki dute orain.
Hala, ostegun honetako, irailaren 5eko Gipuzkoako Aldizkari Ofizialaren bidez argitaratu ditu akats hauen zuzenketak. Horrekin batera, Udaletik iragarri dutenez, bertan izena emateko epealdi berri bat finkatu du. Bihartik, irailaren 6tik zenbatzen hasita 10 egun balioduneko epealdia egongo da horretarako. Honenbestez, hilaren 19ra arteko tartea izango dute interesdunek deialdi horretan izena emateko. "Lehenengo epealdian izena eman zutenek ez dute berriz egin beharko", argitu dute Udaletik.
Bigarren izen-emate epealdia igaro ostean, "onartuen eta baztertuen behin-behineko zerrenda argitaratuko du udalak. Epaimahaia osatu eta horren berri ere emango du".
Zati teorikoa eta praktikoa
Lanpostu horretako zeregina udal elektrikariari laguntzea izango da, besteak beste, zereginotan: udal instalazio elektrikoen mantenuan edota udalak behar dituen azpiegitura elektrikoen prestakuntzan. Hautagaiek, besteak beste 16 urte beteak izan beharko dituzte, B gidabaimena edota 1. hizkuntz eskakizunari dagozkion euskara-ezagupenak frogatzen dituen agiria baita. "Lan poltsan sartzeko probak parte teorikoa zein praktikoa izango ditu: epaimahaiak zehaztu behar du egun berean izango diren ala ez, eta noiz izango diren".