Aldaketa hauek tarteko, udalerri honek inoiz izandako aurrekontu handiena izaten amaituko du 2024. urtea agurtzerako; “zehazki, 19.295.800,58 eurokoa. Dena den, GAOn argitaratu eta jendaurrean egon beharko du erabakiak; alegaziorik ez bada, iragarkia berriz argitaratu eta behin-betiko bihurtuko da”. Haietako bi guztira 338.460 eurokoak izango dira. Aldaketa hauek udaletxeko teilatua berritzera (150.000 euro), udal brigadak baliatzen duen makineria berritzera, zehazkiago esanda lorezaintzako makina bat erostera (65.000 euro) edota udal barruko sarea instalatzeko programa informatikoa erostera (20.000 euro) bideratuko dituzte.
338.460 euroko inbertsioa da guztira, udal gobernu taldetik atzoko udalbatzarrean berri eman zutenez. Diru kopuru hori, kultura saileko beste lehentasun batzuei erantzuteko momentuz aurten bideratu ahal ezingo den Ez Dok Amairu parkerako gordetako 110.000 euroak eta diruzaintza gerakineko 228.460 euro baliatuko dituzte aipaturiko kreditu aldaketa horiek gauzatzeko.
Elkargunea eta haur eskola
Halere, horiek ez dira diru gehien bilduko dituzten kreditu aldaketak izango. Izan ere, 2,7 milioi euroko kreditu aldaketa bat onartu zuen udalbatzak gehiengo osoz (EHBildu alde, EAJ aurka, PSE abstentzioa) ostegun arratsaldeko osoko bilkuran. Kreditu aldaketa horri aurre egiteko mailegu bat eskatuko du Udalak. Diru kopuru hau bi proiektu garatzeko baliatuko dute; batetik, anbulatorio ondoko zelaian kokatu asmo duten Elkargunerako eta baita haur eskola eraberritzeko ere.
Mailegu hau 2027an ordaintzen hasiko da Udala, egun ordaintzen segitzen duen Zumarte Musika Eskolako eraikina berritzeko eskatua zuena ordaintzen amaituko duen urte berean hain zuzen. Mailegu hau eskatzeari esker, udal gobernu taldetik aditzera eman zutenez, “urtero aurrekontuetan zama bat eragingo badigu ere, udal honen aurrekontua kontuan hartuta ez digu eragotziko bestelako inbertsioak egin ahal izatea: orain arte ere hala izan da”. Zenbakitan, urtero 250.000-300.000 euro bideratu beharko dira udal aurrekontuetatik mailegu hau ordaintzera. Horregatik, udal gobernu taldearen esanetan, mailegu horrek bestelako inbertsioak egin ahal izatea erraztuko du.
PSE-ko bozeramaile Petri Romerok balekotzat jo zuen mailegua orain eskatzea baina proiektuari buruzko zehaztasun gehiago jasotzeko nahia agertu zuen. Ildo beretik mintzatu zen baita EAJ udal taldea. “Ez dago ezer mahai gainean”, adierazi zuen Xabier Otxoa jeltzaleen bozeramaileak. Proiektu eta aurrekontu zehatzik gabe “abenturatzea da” bere esanetan, kreditu aldaketa hori onartzea. Ez dute beharrezkoa ikusten modu horretan egitea, gogorarazi zutenez, aurten dirurik xahutzerik izan ez eta laster 2025eko udal aurrekontuak negoziatzeko unea helduko denean. Argi utzi nahi izan zuten, “Elkargunea babesten dugu”, zioen Otxoak. Guraso talde batek eginiko eskaerarekin bat eginez, gainera, haur eskola eremu berean integratzearen alde agertu zen EAJ. Proiektuarekiko aurkakotasunagatik ez, “moduak ez dira egokiak” adieraziz aurka bozkatuko zutela iragarri zuten.
Horri erantzunez, udal gobernu taldetik jakitera eman zuten, proiektu zehatza osatzeko lanean ari direla. Gogoan izan, Elkargunearen egitasmoa diseinatzeko negu eta udaberri partean Elhuyarrek dinamizaturiko parte hartze prozesua egin zela herrian. Prozesu horretan jasotakoan oinarrituko da egitasmoa. “Elkargunearen partaidetza prozesuan oso presente egon da alde ekonomikoa: oraindik ez daukagu proiektu arkitektonikorik, baina badakigu gehienez ere zeri erantzun diezaiokegun”, udal gobernu taldearen esanetan
Kreditu aldaketa hauek egiteko 2024ko udal aurrekontuen partiden garapenari eginiko jarraipenetik dator. Urte amaitu arteko aurreikuspenak egitetik hain zuzen.
Egoera ekonomikoa
Likidezia arazorik ez du. Hala berretsi zuen udal kontuhartzaileak atzo udalbatzak eginiko osoko ohiko bilkuran. Hiruhilero egiten duten moduan, udalbatzaren osteguneko bilkura baliatu zuten 2024ko 2. hiruhilekoko ordainketen bataz besteko epeari eta aurrekontuaren exekuzioari buruzko argibideak emateko, hau da, iragan apirilaren 1etik ekainaren 30eko epealdiari dagozkion xehetasunak. Ordainketen epea bataz beste sei egunekoa izan zen urteko bigarren hiruhilekoan, hilabeteko epealdiaren oso azpitik. Bestalde, aurrekontuaren exekuzioari dagokionean, ekainaren 30era arte aurreikusi baino sarrera gehiago eta gastuak iazko baino apalagoak izan zirela berri eman zuten. Ondorioz, aipatu moduan, “likidezia handiagoa” dela.