Iragan urriaren 29an hasi zen udal gobernu taldeak diseinatua duen 2025eko udal aurrekontu proposamena aurkezten, herritar nahiz eragileen ekarpenak biltzen edota tokian tokiko gaiak aztertzen. Aginagan, Kalezarren, Santuenean eta Munalurran egin zituzten lehen saioak iragan astean zehar. Aste honetan Atxegaldeko eta Txokoaldeko bizilagunekin ere bildu dira. Besteak beste, Kalezarren Belmonte kaleko trafikoa izan zuten hizpide, Aginagan, Eliza Zaharra, alagunea eta semaforoak, Santuenean auzoko sarreraren berrantolaketa eta autobus geltokia edota Txokoalden Altzonazko zubiko konponketa lanak.
Etxealdiako bizilagunekin bilduko dira asteazken honetan, ostegunean zubietarrekin. Izan ere, udal gobernu taldeak, guztira, bederatzi aurkezpen saio antolatu ditu azaroaren 12ra bitartean Usurbilgo herri eta auzoetan.
Erronda honen ondoren, eta aldaketarik ez bada, udal aurrekontuak hasieraz onartuko dira azaroko osoko bilkuran. Hala, abenduan jendaurrean izan, eta 2025 hasieran martxan egoteko moduan egon daitezen. Herri-auzoetako bilerekin batera, oposizioko alderdiek ere tartea izango dute proposamena aztertu eta ekarpenak egiteko.
2025eko udal aurrekontuen aurkezpenak
Azaroak 6, asteazkena
18:00 Etxealdiako bilera Potxoenean. Gaiak: igogailua eta irisgarritasun plana.
Azaroak 7, osteguna
18:00 Zubietako bilera Kaxkapen. Gaia: bidegorriaren proiektua.
Azaroak 12, asteartea
18:00 Herri erdiguneko bilera Potxoenean.
Deitzailea: udal gobernu taldea.
Etxealdiaren txanda gaur, 2025eko udal aurrekontu proposamena aurkezteko bilera errondaren baitan
Udal gobernu taldea Etxealdiako bizilagunekin bilduko da gaur, 2025eko udal aurrekontu proposamenaren harira eta zubietarrekin ostegunean.