Euria ari du asteazken goiz honetan eta gogotik egin dezake datozen orduotan. Izan ere, goizaldeko 6:00etatik abisu horian gara prezipitazio iraunkorragatik eta hala segiko dugu 24 orduz, ostegun goizeko 6:00ak arte. Tarte horretan, Euskalmet meteorologia agentziak ohartarazi duenez, "Kantauri isurialdeko zenbait lekutan 24 ordutan 60 l/m² baino gehiago pila daitezke, bereziki kostaldean. Euri ertaina, iraunkorra eta oso ugaria egingo du".
Euritan
Honenbestez, gaur, azaroak 20, Usurbilen, "giro goibela" izango dugu Euskalmet-en arabera eta "euria sarri egingo du. Mendebal/ipar-mendebaldeko haizea ibiliko da, bolada gogorrekin, batez ere egunaren hasieran. Tenperatura maximoak gutxi edo nahikoa jaitsiko dira".
Ostegunean, "goiz-lanbroa. Zerua hodeitsu egongo da, arratsaldean hodeiak ugaritu egingo dira. Euri txikia egingo du, goizaldean eta gauean noizbehinka ertaina. Mendebal/hego-mendebaldeko haize ahul-bizia ibiliko da, bolada gogorrekin; arratsaldean indartu egingo da eta gauean ipar-mendebaldera egingo du. Tenperatura minimoetan aldaketarik ez eta maximoak gutxi edo nahikoa igoko dira".
Ostiralean, "zerua oso hodeitsu edo estalita egongo da; goizean hodeiak gutxitu egingo dira eta arratsaldean zerua hodei gutxirekin edo partez hodeitua geratuko da. Egunaren lehenengo partean euri txikia egingo du, bereziki goizaldean. Ipar-mendebaldeko haize bizia ibiliko da, bolada gogorrekin; goizean haizeak ipar/ipar-ekialdera egin eta indarra galduko du. Arratsalde-gauean hego/hego-mendebaldeko haizea ibiliko da, bolada gogor batzuekin gauean. Tenperatura nahikoa jaitsiko da".
Informazio eguneratuaren berri euskalmet.eus atariaren bidez jaso ahalko duzue.
Prezipitazio iraunkorragatik abisu horian ostegun goizaldera arte
Prezipitazio iraunkorragatik abisu horian gara asteazken goizalde honetatik. 24 orduz segiko dugu egoera berean, ostegun goizeko 6:00ak arte.