Ziortza gazte elkarteak ostiralean eginiko San Tomaseko ospakizunaren ondotik, topaketa egun betean murgilduko gara aste honetan, aipatu eragile horren, Gaztelekuaren, Aztarrika gazte asanbladaren eta Kulturgunearen eskutik. Izan ere, haiek guztiak ari dira sustatzen Elkargunea proiektua azken urteotan. Horren eraikuntzari segida emateko, eragileon artean sortutako lankidetza sustatzen jarraitzeko topaketak antolatu dituzte egunotarako.
Astelehen honetan, abenduaren 23an Usurbilgo memoria historikoari lotutako ibilaldi gidatua iragarri dute eguerdi partean. Usurbil 1936 elkartekoen eskutik, 1936ko gerrak Usurbilen utzitako arrastoa ezagutzeko aukera izango dute parte hartzaileek.
Astelehen arratsalderako, bestalde, Aztarritruk bigarren eskuko azoka egingo dute frontoian. Azoka irekia, bertan egongo diren artikuluak berrerabiltzen segitzeko. Beste bi hitzordu ere iragarri dituzte; biak ala biak, Suteginn. Izan ere, kultur-etxeko erakustaretoan, abenduaren 26ra arte bisitatu ahalko den erakusketa irekiko dute. Bertan, Elkargunearen proiektuaren nondik norakoak ezagutzeko aukera izango da; bilgunea osatzen duten eragileen berri nahiz eraikitze bidean diren eta etorkizunean anbulatorio ondoko zelaian leku hartuko duen Elkargunearen nondik norakoez informatu ahalko gara.
Sutegi atarian iragarri dute, azkenik, astelehen honetarako azken hitzordua; topaketon irekiera ekitaldi ofiziala.
Segidan duzue, abenduaren 26ra arte iragarritako ziklo honen egitaraua.
Lankidetza oparoa
Nerabeen, gazteen eta kulturgileentzako, nork bere egitasmoak bideratzeko, lankidetzarako nahiz biltzeko espazio berri baten beharrak batu zituen eragile guztiok iaz, eta ordutik, emankorra izan den lankidetza bidea jorratu dute. Urte hasieran, Udalarekin adostu zuten Elkargunea anbulatorio ondoko zelaian eraikitzea. Gero, otsailetik udaberri amaierara arte, egitasmo hau diseinatzeko Elhuyarrek dinamizaturiko parte hartze prozesuan murgildu ziren.
"Gero bat gaurdanik: Elkargunea eraikitzen"
Abenduak 23, astelehena
12:00 Usurbilgo Memoria: ibilbide gidatua (Usurbil 1936 elkartea) Mikel Laboa plazatik.
17:30-20:00 Aztarritruk frontoian: Aztarrikaren bigarren eskuko truke-azoka. Bilketa: abenduaren 19an eta 20an, 17:30-19:30, Sutegin.
18:00-20:00 Elkarguneko eragileen erakusketa irekiera Sutegiko erakustaretoan.
20:00 Gabonetako topaketen irekiera ekitaldia Sutegiko aterpean.
Abenduak 24, asteartea
Goizetik, baserritar jantziekin.
11:00 Talogintza ikastaroa Usurbilgo talogileekin frontoian.
11:30-14:00 Elkarguneko eragileen erakusketa Sutegiko erakustaretoan.
17:00 Aztarrikant: Palestinaren aldeko kantujira frontoitik.
Abenduak 26, osteguna
11:30-14:00 Elkarguneko eragileen erakusketa Sutegiko erakustaretoan.
17:00 Txirikorda: Usurbilgo lehen Etxebizitza Asanblada Herritarra (Txirikorda eta Aztarrika).
17:30 Sormen tailerra (Kulturgunea, Gaztelekua, Ziortza): antzerkia (Jontxu Martinez) eta eskulangintza (EITI), Anuk eta Elene solasaldi musikatua.
Amaieran, merendola.
Antolatzaileak: Kulturgunea, Ziortza, Aztarrika, Gaztelekua.
