Igande haizetsua iragarri dute erregeen etorrera egun honetarako. Gauerdiaz geroztik abisu horiaren eraginpean gara eta hala segiko dugu astelehen goizaldeko 6:00ak arte. Tarte horretan, "Hego-osagaiko haize-boladek (egunaren lehen zatian hego-mendebala nagusituko da) 100 km/h-ko abiadura gaindi dezakete" haizeguneetan. Bestalde, "haizeguneak ez diren tokietan, boladak 50-70 km/h ingurukoak izan daitezke. Gauean haize-boladak 60-80 km/h ingurukoak izan daitezke".
Gainerakoan, gaur, Usurbilen, Euskalmet meteorologia agentziaren arabera, "zerua hodeitsu egongo da, erdi mailako hodeiekin eta goi-hodeiekin. Hego-osagaiko haizea bizi-gogorra ibiliko da, bolada oso gogorrekin; hego-mendebala nagusituko da. Tenperatura gutxi igoko da".
Astelehenean, Euskalmet-en arabera, "zerua hodeitsu egongo da, tarteka oso hodeitsu. Zaparrada txikiak botako ditu, zenbait lekutan ertainak, probabilitate handiagorekin egunaren erdiko orduetan. Baliteke trumoi-ekaitzak botatzea. Mendebal-osagaiko haize ahul-bizia ibiliko da, bolada gogorrekin; goizaldean eta goizean goiz hego-mendebala nagusituko da eta bolada oso gogorrak izango dira. Tenperatura nahikoa edo nabarmen jaitsiko da. Tenperatura minimoak egunaren amaieran neurtuko dira".
Informazio eguneratua, euskalmet.eus bidez jaso ahalko duzue.
Haizea izango du bidelagun erregeen etorrerak, abisu horian izango gara egun osoz
Gauerdiaz geroztik abisu horian gara haizeagatik eta hala segiko dugu astelehen goizaldera arte.