Beste behin, hiru erregeak gure artera heldu badira, hori Ziortza Gazte Elkarteari zor zaio. Izan ere, aurtengoan ere bilgune honetako auzolanak bideratu du erregeen kabalkada. Prestaketa eta antolaketa lan guztiaz arduratu dira; besteak beste, Baltasar, Gaspar eta Meltxor erregeei bidea argitu diete, Urdaiagatik frontoiraino igande iluntze honetan egindako biran.
Ziortza gazte elkarteko kideak izan dituzte bidelagun, beraz, hiru erregeek. Kabalkadan soilik ez, goizean frontoian eginiko dinamikak ere antolatu ditu Ziortzak. Postaria haurren gutunak biltzen aritu da. Haurrek opariak ezkutatzen eta zapiekin jolasean aritzeko aukera ere izan dute.
Aurten, are gehiago nabarmendu beharra dago bilgune hau. Hain zuzen, 2025a berezia izango da haientzat, 40 urte bete baititu Ziortzak eta, aurrerago, urtemuga hau ospatzekotan dira.