Gabonetako hamaika ekimen iruditan

Urteko garai bizienetako bat izaten da Usurbilen igaro berri duguna. Abendua, urte amaiera eta urtarrila honetako lehen egunak mugituak izaten dira herri bizitzaren ikuspegitik. Izan berri duguna ez da salbuespenezkoa izan.

Hamaika hitzordu izan ditugu asteotan. Elkargunea herriratu eta bilgunea osatzen duten eragileen arteko (Kulturgunea, Ziortza, Gaztelekua eta Aztarrika gazte asanblada) hartuemana sendotzeko, duela bi urte hasitako lankidetzan sakontzeko topaketak antolatu zituzten abenduaren 20tik 26ra; bigarren eskuko azoka, Aztarrikant, talogintza eta sormen tailerrak, erakusketa, etxebizitzari buruzko herri asanblada...

Harrerak
Euripean heldu ziren, bestalde, Mari Domingi eta Olentzero gure artera, ibilaldi azkar eta labur batekin. Frontoian egin behar izan zitzaien harrera, bezperan Aginagan izan zen Olentzero. Auzoetara ere hedatu zen gabon giroa; Santueneara azoka, San Tomas eguneko ospakizun edota irristaketa ikastaroarekin. Kirol hitzordu bereziak ere izan ditugu egunotan; Harane 2024 futbol txapelketa edota Mirotzen omeneko eskubaloi lehiaketa.

Haurrak izan ditugu protagonista opor hauetan, hainbat ekintza antolatu direlako haientzat; tartean, magia ikuskizuna antolatu zuten Sutegin. Ikastetxeetan eginiko gabon giroko emanaldi eta kalejirekin barneratu ziren atseden egunotan.

Otarrak eta lasterketa
Urte garai honetako ziklo honi, halere, NOAUA! K.E.-ren San Tomas azokarekin ekin zitzaion. Beste azoka batean, Hurbilagorenean aurkeztu zuten urte amaieran zozketatu eta banaturiko herri ekoizpenaz eta sorkuntzaz hornituriko ehun 650 Usurbil Bizi otarrak.

Abenduaren 31n agurtu genuen urteko herri dinamika Hurbilago San Silbestre herri lasterketarekin. 2025a hasi, ezkilak joz abiatu zuen herritar talde batek Salbatore elizan. Gabonetako parkearekin edota erregeen kabalkadarekin borobildu zen ziklo hau.

Hitzordu hauen guztien irudiak txoko bakar eta berean jaso ditugu, "Gabonak 2024-25" izeneko web orrialde honetako kanalean, noaua.eus/bereziak atalean.