Amets Arzallusen "Miñan" liburua antzezlanerako egokitu du Artedramak. NOAUA! Kultur Elkartearen Kulturaldi amaieran ikusi ahalko duzue, otsailaren 9an. "Gure herrian eta mundu zabalean oihartzun handia izan duen liburu bat taula gainera ekarriko dugu", iragarria du Artedramak. Erronka handitzat jo du egitasmo hau, "horren ezaguna egin den testu bat, antzerkira egokitzea. Migrazioa eta arrazakeriaren gaiak ardatz hartuta, ikusle gazteengan jarriko dugu arreta batez ere". Izan ere, "Ander Lipusekin batera oholtza gainean jokatuko duten aktore gazteen indarrak, haize berri bat ekarriko dio euskal eszenari; gizarte zabal, anitz eta normalizatu baten ispilu izango gara".
Antzezlaneko edukiari dagokionean, albiste honi atxikitako bideotan ikus dezakezue aurrerapena. "Ibrahima Balderen bizitzaren kronika da antzezlan hau, hark ahoz kontatua, Amets Arzallusek idatziz jasoa, eta Artedramak antzerkira egokitua".
Ander Lipusek zuzendua
Sutegiko oholtza gainean ikusiko dugun kontakizuna Ginean abiatzen da. "Ibrahima kamioi batean zebilen aprendiz Ginean, egun batean amak deitu zuen arte: anaia txikia falta zen etxean. Eta haren bila abiatu zen. Basamortua gurutzatu; pasatzaile, polizia, bahitzaileekin topo egin; egarria, gosea, mina ezagutu. Afrikatik Europarako bidea. Mediterraneoa zeharkatzen dutenak deshumanizatzea ezinbestekoa da haien heriotzen, kanporatzeen, ilegalizatutako bizitzen gaineko ezaxola zabaltzeko. Baina bizitza horietako bakoitza bakarra da eta, beraz, unibertsala. Eta kontatzeak hori azpimarratzen du".
Oholtza gainean agertuko zaizkigun aktoreak Ander Lipus, Sambou Diaby, Eihara Irazusta eta Mikel Kaye izango dira. Aipatu moduan, Amets Arzallusek idatzitako "Miñan" liburuan oinarritua dago antzezlana, Ibrahima Balderen istorioan. Lipusek berak zuzendu du egokitzapena.
"Miñan" antzezlana otsailaren 9an ikusi ahalko duzue, arratsaldeko 18:00etan Sutegiko auditorioan. Hitzordurako sarrerak salgai dituzue 10 eurotan, usurbilkultura.eus plataforman edota NOAUA! K.E.-ren egoitzan. NOAUA! K.E.-ko bazkideok 8 eurotan eskuratu ahalko dituzue kultur elkartearen egoitzan.
