Gehiago izan dira jasotako proposamenak baina bi dira final nagusira heldutakoak. Martxoaren 1ean ospatuko dugun Inauteri Festa egunaren prestaketa lan betean da NOAUA! Kultur Elkartea. Egunean zehar izango diren ekintzak antolatzen hasia da, baina beste ezer baino lehen, mozorrotzeko gaia hautatu behar du. Aukeraketa prozesua azken txanpan da dagoeneko. Izan ere, hainbat proposamen helarazi dituzue, baina bi dira une honetan lehia honen azken txanpara iritsitakoak. Haien artean bat hautatzeko egun gutxi batzuk baino ez dituzue.
Bi proposamen
"Usurbil 3025" edo "superheroiak". Bi gaiotako bat da, laster, kultur elkarte honek martxoaren 1erako Inauteri Festarako proposatuko dizuena. Zuek izango duzue azken hitza. Asteazken honetan bertan, urtarrilaren 22an, web orrialde honetan eseki dugun inkestan duzue proposamen bat edo bestea babesteko aukera.
"Usurbil 3025" da aurtengo gaia erabakitzeko hautaketa prozesuaren amaiera honetan lehian den gaietako bat. Etorkizunari begira jarriko gaitu, zuen artetik heldutako ekarpen honek. Mila urte barruko herria, herrikideak, mundua irudika dezakeen mozorroen festa izateko gonbita dugu gai hau. Etorkizuneko inauteriak bizitzeko aukera izan dezakegu, zuek hala nahi baduzue.
Bestela, hortxe dugu "superheroien" gaia ere. Hauetako asko eta asko segituan irudikatuko ditugu, esaterako, marrazki bizidunengan pentsatzen jartzen bagara. Baina proposamen honek haratago joan nahi du. Gutako bakoitzaren bizitzetan superheroitzat ditugun hezur-haragizko horiek ekarri nahi ditugu martxoaren leheneko festaren erdigunera. Zein da zure superheroia? Gustukoren bat baduzu, hortxe duzu aurtengo mozorrorako gaia.
Bat edo beste, "Usurbil 3025" edo "superheroiak", mozorrotzeko zein proposamen duzun gustukoen erabakitzeko web orrialdeko INKESTAN parte har dezakezu.
Aurreko Inauteri Festetan...
2025/3/1: "Superheroiak" edo "Usurbil 3025".
2024: fauna.
2023: filmak.
2022: gai librean ospatu zen Inauteri Festa.
2021: osasun krisialdia tarteko, ez zen Inauteri Festarik antolatu.
2020: dantza.
2019: jolasak.
2018: ospetsuak.
2017: Ingurumena.
2016: lanbideak.
2015: ipuinak.
2014: Erdi Aroa.
2013: musika.
2012: mitologia.
2011: itsasoa.
2010: zirkoa.
2009: Olinpiar Jokoak.
2008: xomorroak.
2007: Brasil.
2006: marrazki bizidunak.
2005: Usurbil, Oesteko herri.
2004: Hollywood.
2003: munduko kulturak.
2002: extralurtarrak.
Inauteri Festa
Inauterietan mozorrotzeko bi proposamen lehian
2025eko martxoaren 1ean ospatuko dugun Inauteri Festa egunez zertaz mozorrotu nahi duzuen erabakitzeko azken egunak dituzue honako hauek. Zuek helarazitako proposamenetatik bi heldu dira hautaketaren azken fasera.
