Hartu eta eman, horretan oinarritzen dira harremanak eta lerrootan mintzagai dugun HarEman egitasmoa. Usurbilen bizi direnak eta bizitzera datozenak hartuemanetan jarri zituen iaz. Bikoteetako bat Lina Rinconek eta Prexen Egiletak osatu zuten. Bizitako esperientziaz, eraiki duten harremanaz mintzatu dira, HarEman egitasmoa berraktibatuko dutela iragartzeko ostiral goiz honetan Udalak eta ekimenaren dinamizatzaile Zabalduz kooperatibak udaletxeko udalbatza aretoan eginiko agerraldian.
"Sostengu oso garrantzitsua"
"Oso esperientzia polita da", nabarmendu du Linak. Izan ere, gogorarazi duenez, sorterria utzi eta herrialde batera bizi-proiektu berri bati ekitera doanak kultur talka handia bizi du. "Ordu aldaketa, zuen ohiturak ez dira gureak bezalakoak, ordutegiak... Dena talka handia izan zen guretzat". Horregatik, zioen, "proiektu honek gure herrian integratzen laguntzen gaitu eta oso ona da".
Prexen Egileta ezagutzea ahalbidetu dio HarEman egitasmoan parte hartu izanak. Usurbilgoaren laguntza handia jaso zuela nabarmendu du. Herria ezagutarazteaz gain, gidari lanak egiteaz gain, "beti oso adi egoten da gurekin". Oso gogoan du, nola senarrak Gasteizera lanera joan behar izan zuen eta bera Usurbilen haurrarekin bakarrik zegoen. Gerora ere bai, baina bereziki tarte horretan, "sostengu oso garrantzitsua izan zen Prexen". Agerraldian parte hartutakoak hunkitu ditu Linak, tartean, bueltan eskertza besarkada eman dion Prexen.
Aukera izan ahala, proiektu honen berri eman die Linak Usurbila iritsitako hainbati, nabarmendu duenez, "oso zaila delako integrazioa".
Ohitura, bizimodu berriak ezagutzeko aukera
Ildo beretik mintzatu da baita Egileta. Izan ere, HarEman egitasmoan parte hartzen hasi aurretik, ezertaz ezagutzen ez zuen herrikide berri batekin hartuemanetan jartzea ahalbidetu dio proiektu honek Prexeni. Lina eta biak elkar ezagutzen hastearekin batera, herriaren ezagutzan sakontzen joan ziren; esaterako, astearteetako "Goazen kalera, Usurbil" dinamikako ibilaldi osasuntsuetan ere parte hartzen hasi ziren.
Usurbilgoen parte hartzearen garrantzia nabarmendu du. Berak bizitakotik azaldu ahal izan duenez, Linarekin herrian ikusteak jakinmina piztu du hainbat herrikiderengan eta horrek aukera eman dio Prexeni ahoz-ahokoaren bidez, egitasmoaren berri eman eta Lina ere herriko jendartean gehiago murgiltzeko. Emandakoaz gain, HarEman-etik, kasu honetan Linaren aldetik jasotakoa goraipatu du Prexenek. "Proiektu hau oso positiboa da haientzat eta guretzat. Bere ohiturak, bizimodua ezagutzeko" eman diola azpimarratu du, HarEman-eko bikote guztien topaketan nork bere sorterriko gastronomia dastagai jarri zuten moduan egin bezalaxe esaterako. Beste modu batean ezagutzerik izango ez zuen herrikide bat ezagutzea ahalbidetu dio. Dagoeneko lagun berri bat.