Usurbilen bizi direnak herrira bizitzera etorritakoekin hartuemanetan jartzen dituen HarEman egitasmoak 2023an abiarazitako bidean sakontzen jarraitzeko asmoa du, haren sustatzaileek gaur Usurbilgo udaletxean eginiko agerraldian aditzera eman dutenez.
Iraunkortasuna
Udalak kontrataturiko Zabalduz kooperatiba da HarEman dinamizatzen duena sorreratik. Dinamizatzaile berria du egun; hastapenetik zeregin horretan jardundako Loira Manzaniren lekukoa hartu du usurbildar batek. Ardura hori bere gain hartuko du aurrerantzean, gaurko agerraldian hitza hartu duen Julen Bengoetxeak.
Bere ahotik ezagutu ditugu egitasmoak dakartzan gainerako berrikuntzak; bi nagusiki. "Programaren funtsa 2023koaren bera izango da" aurrerantzean ere, iragarri duenez; hau da, Usurbila bizitzera etorritakoak jada herri honetan bizi direnekin hartuemanetan jartzen eta haien arteko elkar ezagutza bultzatzen segiko dute, baina bi berrikuntzekin. Batetik, lehen egitasmo honetan parte hartzen zuten bikoteei sei hilabeteko konpromisoa eskatzen zitzaien eta tarte horretan, harreman hau bideratzen laguntzen zuen Zabalduz kooperatibak. Aurrerantzean, egitasmoa "modu iraunkor batean eskainiko dugu".
Taldekako mentoretza
Bigarren aldaketa; orain arte, bi lagunen arteko harremanak bideratzen zituzten. Hemendik aurrera, ordea, "bakarkako mentoratzea eskaintzeaz gain, taldekako mentoretza eskainiko dugu" baita. Honenbestez, "talde bat ere izan ahalko da, Usurbila etorritako pertsona baten mentore". Talde hori, lagun talde edo kuadrilla bat edo herri eragile bat ere izan ahalko da.
Berrikuntza hauekin, orain arte bezalaxe, "bikote berriak osatzen segi nahi dugu eta horretarako behar ditugu mentoreak eta mentorizatuak". Ezaugarri edota zaletasunen araberako bikote harremanak eraikitzen laguntzen jarraituko dute. Parte hartzaileek astean behin biltzeko konpromisoa hartu beharko dute. "Harremana eraikitzeko prozesu horretan, Zabalduz-en partetik ematen zaie laguntza profesional bat, sei hilabete inguruko iraupena izango du", harremana finkatu arte. "Parte hartzera animatzen zaituztegu, oso esperientzia aberasgarriak sortzen dira".
Izena emateko eta argibide gehiago jasotzeko:
722 446 156
hareman@zabalduz.eus
usurbil.eus/hareman