Pantailen erabilerari buruzko kafe-tertulia gaur

Noaua Aldizkaria 2025ko api. 2a, 07:23

Bi ekimen antolatu ditu apirilerako Hitz Aho Udarregi ikastolako guraso elkarteak; lehenengoa, asteazken honetarako, apirilaren 2rako.

Gaurkotasun handiko gai baten inguruko nahiz sorkuntzara bideraturiko ekimen bana antolatu du Hitz Aho Udarregi ikastolako guraso elkarteak udaberri hasiera honetarako. Hasteko, pantailen erabilerari buruzko kafe-tertulia iragarri dute hurrengo asterako. “Giro atseginean ikasmaila desberdinetako gurasoek elkar ezagutu eta informazioa trukatzeko aukera izango da”, iragarri dute Hitz Ahotik. Bestalde, ate joka dugun udaberriko oporraldirako saio artistiko esperimentalak antolatu dituzte 7-12 urte arteko haur eta gaztetxoentzat. Zorione Mendezek gidatuko ditu apirilaren 22tik 25era. Izena emateko epealdia zabalik dute.

“Xut, udaberriari keinu” izeneko ekimenean, "naturarekin bat eginez, udaberria interpretatuko dugu irudiz eta hitzez". Zehaztu dutenez, “banakako zein taldeko ariketak egingo ditugu hiru dimentsioetako irudiak sortuz.  Tamaina handian margotu eta idatziko dugu.  Animalia eta landare desberdinak azalduko dira bertan.  Garaiari loturiko soinu eta onomatopeiek ere jantziko dute lana. Bukatzeko, ipuin ezberdinak sortuko ditugu”. 

Hitz Ahoren deialdiak
Apirilak 2, asteazkena
17:00
Kafe-tertulia Potxoenean: “Pantailen erabilerak kezkatzen zaitu?”.
Oharra: haur txikiekin joan ahalko da.

Apirilak 22-25, asteartetik ostiralera
10:30-12:00
“Xut, udaberriari keinu” Zorione Mendezen eskutik, saio artistiko esperimentalak Udarregi ikastolan, 7-12 urte artekoei zuzenduak.
Izena emateko formulario hau bete beharko da: https://forms.gle/VzKPN1f8XoyqvG8h9

Antolatzailea: Hitz Aho Udarregi ikastolako guraso elkartea.