Musika sorkuntzari lotutako erakusketa eta solasaldia Soinurbil agurtzeko

Azken txanpan da 40. urtemuga betean den Zumarte Musika Eskolaren 21. Soinurbil zikloa, orain arteko edizioetan luzeena.

Batetik, Sutegin "Janela: leiho bat Gorka Urbizuren unibertsora begira" izeneko Ibai Arrieta del Pico argazkilari usurbildarraren erakusketa bisitatzeko azken asteburua izango duzue honako hau. Gorka Urbizuk Berri Txarrak taldeak desegin osteko bere bakarkako ibilbidearen hastapenak, bere lehen sorkuntza lanaren prozesua islatzen duen irudi bilduma ezagutzeko azken egunak dituzue honako hauek. Izan ere, igandean itxiko dute erakusketa. Erakusketa horren baitan, erakustaretoko bildumari buruzko xehetasun gehiago jasotzeko azkeneko bisita gidatua programatua dute ostiral honetarako, hilaren 28rako; usurbilkultura.eus plataforman eskuragarri zeuden gonbidapenak, ordea, agortuak daude.

Musikaz solasean
Musika sorkuntza izango du hizpide baita, Zumarteren Soinurbil zikloko azken hitzorduak. Gai horri lotutako solasaldia antolatu dute iganderako, hilaren 30erako Sutegin. Bi gonbidatu jarriko ditu solasean musika eskolak, Gari Udabek moderatuko duen saioan; batetik, Olatz Salvador. 2010ean bere ibilbidea Skakeitan taldean hasi zuen. Lau urte geroago, sortua zuen abesti sorta bat oholtza gainera eraman zuen estreinakoz. 2018an kaleratu zuen "Zintzilik" izeneko bere lehen sorkuntza lana. Gerora etorri dira, "Zizel", "Aho Uhal" eta "Zainak eman".

Salvadorrekin ariko da solasean Jokin Pinatxo, gehienontzat Janus Lester gisa ezagunagoa izango dena. Musikari beratarrak "Ez gaitzala loak harrapatu" estreinako lana argitaratu zuen 2022an eta "Lore" izenekoa iaz. Ekitaldirako gonbidapenak usurbilkultura.eus plataforman eskura ditzakezue.

Hauek dira 21. Soinurbil borobiltzeko geratzen diren azken ekintzak:

21. Soinurbil
Martxoaren 30era arte
"Janela: leiho bat Gorka Urbizuren unibertsora begira" argazki erakusketa Sutegiko erakustaretoan.
Ordutegia:
-Ostegun eta ostiraletan: 17:30-20:00.
-Larunbat eta igandeetan: 11:30-14:00 / 17:30-20:00.
Hitzorduak:
-Martxoak 28 (18:30): bisita gidatuak. Bisitarako gonbidapenak agortuak.
Zehaztasunak: "Argazki erakusketa honetan Gorka Urbizu musikariak 2024an kaleratu zuen. “Hasiera bat” lanaren, grabaketa prozesuan eta lehen kontzertuetako une berezi eta intimoetan egindako argazkiak aurkezten ditu Ibai Arrieta del Pico argazkilari usurbildarrak. Erakusketa honetan "leiho" txiki bat zabaltzeko proposamena egiten da, kantuaren muinerako bidaian aurkitzen den musikariaren barne mundura gerturatzeko gonbidapena".
Laguntzaileak: Only In Drems /Koldo Mitxelena Kulturgunea/ Gipuzkoako Foru Aldundia.


Martxoak 30, igandea
18:00 Musika Sorkuntzaz berriketan Sutegiko auditorioan.
Hizlariak: Olatz Salvador eta Jokin Pinatxo.
Moderatzailea: Gari Udabe.
Zehaztasunak: “2025ean 40 urte beteko ditu Zumarte Musika Eskolak. Hamaika ikastaro, emanaldi eta bizipen. Hauek denak oroitu eta omentzeko ekitaldi ugari izango dira 2025ean. Ekitaldi hauen barruan kokatzen da "Musika Sorkuntzaz berriketan" hitzaldia”.

Antolatzaileak: Zumarte Musika Eskola eta Usurbilgo Udala.
Laguntzaileak: Salbatore Parrokia eta Gipuzkoako Foru Aldundia.