Bakardade egoera ez hautatuan, egoera hauskorrean diren adinekoak artatzea erronka izango duen Hurbilduz auzo-zaintza proiektu berria aurkeztu dute larunbat honetan Sutegin eginiko "Usurbil, herri zaintzailea" ekitaldian. Zabalduz kooperatibak abiaraziko du, kultur-etxeko auditorioko hitzorduan hitza hartutako ordezkari Aitzol Mendiburuk eta Julen Bengoetxeak berri eman zutenez.
"Proiektu hau inplementatzeko beharra ateratzen da Usurbilen talde desberdinek eginiko hausnarketa prozesuari esker, zaintza eredu publiko komunitarioari begira. Gure lan-ildoetako bat da zaintza eredu honen komunitate arloan lan egitea, besteak beste", Bengoetxearen esanetan.
Hurbilduz auzo-zaintza proiektuaren helburua, "komunitatean harremanak sustatuz, pertsona hauen ongizatea eta autonomia hobetzea da". Horretarako, batetik, "eskuhartze profesionala eskainiko zaie. Lehenbizi, gerturatuko gara pertsona hauengana. Harreman bat sortuko dugu konfiantzazkoa, haien errutinak, zaletasunak ezagutuko ditugu. Hauek denak kontuan hartuta, komunitatera joango gara harremanak sortzera", gaineratu zuenez.
Komunitatea, gakoa
Egoera hauskor horretan diren pertsonak identifikatzeko modu prebentiboan lan egin asmo dute; "alegia, pertsona bakardade egoerara iritsi baino lehen, esku hartu nahi dugu". Bistan denez, "ez da izango erraza pertsona hauen identifikazioa egitea". Horregatik, "gizarte zerbitzuetan dugu inplementatua sistema informatiko bat", pertsona hauengana hurbiltzen hasteko. Halere, komunitateari erreparatu nahi diote. "Interesgarria iruditzen zaigu, lan honetan. Azkenean, bizilagunek informazio asko dute" egoera honetan egon daitezkeen herrikideei buruz. Komunitate hori sentsibilizatua egoteak, identifikazio lan hori ere erraztuko lukeela zioten Zabalduz-eko kideek. "Azkenean, ortzi-muga herri zaintzailea" izateko bide hori jorratzea izango da.
Beraz, hasteko, Usurbilgo errealitate hau ezagutzeko diagnosi bat lantzea ezinbestekotzat jotzen dute, herritarrek gai honekiko duten pertzepzioa jaso eta egon daitekeen konpromiso maila ezagutzeko. Horretarako, batetik, eragile, talde ezberdinekin elkarrizketa erronda bat egin asmo dute. Horrez gain, aste honetako Udalaren Udalberri aldizkariaren bidez etxez etxe banatu duten inkesta betetzeko deia egin dute.
Bakardade ez hautatuari buruzko galdetegia
Bakardade ez hautatuaren inguruan herritarrek duten pertzepzioa adierazi eta jasotzea du xede Usurbilgo Udalak prestatu duen galdetegiak. "Zaintza ekosistemaren lanketatik sortu da gaia aztertzeko beharra, eta lehenengo urratsa herritarren ikuspuntua jasotzea izango da", Udalak aurreikusi duenez.
Anonimoki osatu ahalko da galdetegia bera, Internet bidez edota paperean. Paperekoa etxez etxe banatzen ari da Udala egunotan, Udalberri aldizkariarekin batera. Modu horretan osatzen dutenentzat hainbat kutxa kokatu ditu Udalak herrian zehar, tokiotan: udaletxea, Potxoenea, kiroldegia, Emakumeon Etxea, osasun zentroa, Artzabal, Opil Goxo, Otar-Goxo, Kaffa kafetegia, Laurok, Arruti harategia, Aginagako eta Santueneako jubilatuen elkarteak, Egurtzegiko taberna, Zubietako Alamandegi taberna, Esnaola janari denda. Gune hauetan kokaturiko kutxetako batean utzi ahalko da galdetegi hori, apirilaren 16a baino lehen.
Online ere osatu ahalko da, esteka honetan hain zuzen: bakardade ez hautatuari buruzko galdetegia.
Auzo-zaintza proiekturako
Bakardade ez hautatuari buruzko galdetegia Usurbilgo Udalak herrian auzo-zaintza proiektu bat abiarazteko asmoa duelako da, Zabalduz kooperatibaren bidez. Egitasmoa bera definitu aurretik bakardade ez hautatuari buruzko herritarren pertzepzioa jaso nahi dute. "Galdetegiez gain, elkarrizketak ere egingo dira herriko hainbat eragilerekin. Informazio hori guztia aztertu eta ondorioak aterako dituzte, gero, zein behar dauden ezagutu eta beharrezkoak diren esku hartzeak planifikatzeko".
Printzipioz, auzo-zaintza proiektu pilotu bat martxan jarri asmo dute, auzo zehatz batean. "Komunitateak zaintza eskaintzeko izan dezakeen potentzialitatea aprobetxatu nahi da, alegia, herrikideak zaintzeko komunitateak egin dezakeen ekarpena baloratzea. Hala ere, ez da baztertzen galdetegi eta elkarrizketetatik bestelako beharrak azaleratzeko aukera. Garatuko den proiektua eta diagnostikoaren emaitzak udaberrian aurkeztea aurreikusten da".
Zaintza eredu berriaren beharra
Bestelako zaintza sistema baten beharra bazen lehendik ere baina hori argi azaleratu zuen 2020tik aurrera covid19ak murgilarazi gintuen osasun krisialdiak; "egungo zaintza sistema ez dela gizartearen eraldaketara egokitu, eta, beraz, ez dela gai zaintza egoki bat emateko. Eraldaketa horren adierazle dira familia ereduen aldaketa, emakumearen lan munduratzea, indibidualismoa, landa-eremuen despopulazioa, eta abar. Hori ikusita, pandemian bertan jarri zen martxan, Usurbilen, zaintza eredu berri bat eraikitzeko lanketa".
Besteak beste, zaintzarena ere izan zen osasun krisialdi hark agerian utzi zuen asko zirela herrian bakarrik bizi ziren herrikideak. "Telefonoz deitu zien udalak 65 urtetik gora izan eta bakarrik bizi ziren herrikideei, zer moduz zeuden galdetu eta euren beharrak ezagutzeko. Zaintza eredu berri baten beharra nabarmen geratu zen orduan, eta horri erantzuteko modu gisa auzo-zaintza sareak sortzeko aukera jaso zuten".
Egitasmo hau definitu aurretik, aipatu moduan, galdetegi hau betetzeko deia egin du Udalak.