Urtebete daramate elkarbizitzen, Ugartondoko Txirikorda belaunaldiarteko etxebizitza komunitarioan Haira Riverok, Ofelia Rodriguezek eta Mattin Aierbek. 18-30 urte arteko eta 65 urtetik gorako herrikideen bizikidetza eta elkar zaintza sustatzen du proiektu honek. Norbere etxean bizi arren, hainbat espazio komun partekatzen dituzte elkarbizitza hori bultzatze aldera eta dinamika hainbat ere bideratzen hasiak dira. Biltzeko soziedade modukoa dute, "areto txiki bat zine-forumak egiteko. Asanbladak izaten ditugu eta bertan barne-funtzionamendua antolatzen dugu, gure kezkak eta beharrak partekatzen ditugu", azaldu zuen Sutegiko "Usurbil, herri zaintzailea" larunbateko ekitaldi horretan Riverok.
Hamasei etxebizitzako eraikinean hamarretan gazteak bizi dira, gainerako sei pisuetan 65 urtetik gorako herrikideak. "Bi belaunaldi lotzeko helburuarekin sortu zen Txirikorda", ekarri zuen gogora Ofeliak. Komunitate ireki bat eraikitzen ari dira; kooperazioa, elkarren arteko ahizpatasuna eta bizi-kalitate ona sustatu nahi dute. "Badugu baita Txirikordan whatsapp taldea bizilagun guztiok, uneoro komunikazioan gaude. Elkar laguntzen gara".
Elkarrekin urtebetetze festa kolektiboak ospatzen dituzte, garbiketa txandak antolatu, hitzaldi eta zine-forumekin batera. "Bizilagun guztiok identifikatuak sentitzen gara proiektu honekin eta badakigu aurrera goazela", ziurtatu zuen Ofeliak.
Herriarekin partekatzea
Bizitza kolektibo komunitario horretan sakontzen segi asmo dute. Udaletik jasotako "denbora-bankua" izeneko filosofia txertatu nahian dabiltza. "Norberak bere errealitatetik eta bere ezagutzatik ikuspegi kolektibo bat emanez, bere aletxoa jartzea" litzateke, Aierberen esanetan Txirikorda barruko komunitatean eta handik kanpokoan, herrian, "asanbladetan parte hartzetik hasita, arduretara, elkar laguntzara, etxebizitzari eta bizi garen pertsona guztiei erantzungo dieten ekintzak antolatzera" igarotzea.
Egitasmoa, handik kanpoko komunitatearekin partekatu nahi dute. "Oraindik irekia dagoen proiektu bat da, bizirik dago. Martxan gaude. Herritarrekin ere elkarlanean gauzak egiteko tokia da. Gonbidatuak zaudete Txirikordan parte hartzera", luzatu zuten gonbita.
