Aretoa beteta ikusita pozarren agertu zen hitza hartutakoan. "Niretzako bereziki eta Foru Aldundiarentzako ere oso garrantzitsua da gaur hemen egotea, azpimarratzeko zer garrantzia duen hemen egiten ari zaretena, garena" bai Usurbilentzat baita zaintzaren arreta eredua aldatzen ari den Gipuzkoarentzat ere.
Orain arte eginiko bidea ekarri zuen gogora, 2020-30 urte tarterako diseinaturiko agendak abiarazi zuena. "Arlo guztietan eta ez bakarrik mendekotasun arloan, desgaitasun, inklusio edo adin txikikoen arloan eredu berri bat bultzatzeko konpromisoa hartu genuen". Horretarako, agenda martxan jarri genuen, urtero 100 milioi euroko aurrekontua duena".
"Usurbil ere punta-puntan"
Eredu berri horren nondik norakoak azaldu zituen Sutegin. "Pertsona erdigunean jartzen duen eredua da, parte hartzea, komunitatea bultzatzen duena, berrikuntza ere, eta batez ere elkarlana". "Zaintza HerriLab" izeneko estrategia honetara batu dira 18 udalerri, tartean da Usurbil. Laster 24 izango direla aurreikusi zuen Peñak saritua ere izan den estrategia horren baitan. "Usurbil ere punta-puntan egon da hasieratik", txalotu zuen.
Udalerri bakoitza, ordea, bere bidea jorratzen ari da. "Denek ez dute jorratzen kontigentzia bera eta hori guretzat oso aberatsa da. Leku batzuetan jorratzen da mendekotasuna, beste batzuetan desgaitasuna... Garrantzitsua da, leku bakoitzean ikasten eta desikasten dugulako hori guztia, besteekin partekatzen dugulako eta horrela askoz errazagoa da eta askoz eraginkorragoa da ere".
Unibertsitatearekin eginiko ebaluazioak horixe islatu duela dio Peñak. "Horrek erakutsi diguna da pertsonak jasotzen duten arretaren bizi-kalitatearen ikuspegitik askoz hobeto daudela, zaintzaileak eta profesionalak ere bai".
"Egoitza nahi dugu Usurbilen"
Testuinguru horretan kokatu zuen baita Usurbil egiten ari den bidea. Egurtzegi adibidetzat jarri zuen. "Duela hiru legealdi ozen eta argi jaso genuen eskaria: egoitza nahi dugu Usurbilen. Asko kosta da baina egoitza bada Usurbilen eta ez edonolakoa, eredu dena. Eta eredu hori Gipuzkoa osoarentzako da, erreferenteak baita gainerako guztiak eraldatzeko ere. Hemen lantzen ari dena eredugarria da".
Aurrera begira, zioenez, "ez da erraza izango, oztopo asko eta handiak egongo dira. Baina sinistua nago bidea topatu dugula. Aurrera egiteko bi kontu behar dira; alde batetik, inbertsioa. Urtero 2,5 milioi euro ditugu bideratuak halako proiektuak bultzatzeko eta bestea da borondatea". Azken horretatik, "hemen borondatea badaukagu elkarlanerako eta pertsonen bizi-kalitatea hobetzeko. Hor gure konpromisoa, gure esker ona. Hor egongo gara saiakera guztiak egiten elkarlanean".
