"Sinplea baina aldi berean konplexutasun handiko lana dela adierazi nahiko genuke, arreta ereduaren eraldaketaz ari garelako, zaintzak ulertzeko modua aldatzeaz ari garelako". Bazen eraldatzeko beharra, bere esanetan. "Prest izan ginen bere momentuan egiten genuena berrikusteko, uste genuelako aldatzeko beharra bazegoela, eta aurrerapasuo txikienak ere geneukana hobetu zezakeela, merezi zuela saiatzeak".
Aspaldi hasitako bidea da honakoa, bide horretako mugarri esanguratsu hainbat ekarri nahi izan zituen gogora; "bailarako berdintasun teknikariekin batera, 2019an zaintza erregimenaren diagnostikoa abiatu izana, zaintza eraldatzeko beharra konpartitua ote zen berresteko aditu eta arituekin izandako hizketaldiak, zaintzaren afera erdigunera ekartzeko antolatutakoak, Elhuyar solasaldiak, jardunaldiak, hitzaldiak, 2022ko Zaintza Azoka edota herritarrekin izandako bilera edo elkarrizketak, euren bizipenek arduradun tekniko eta politikoei norabidea fintzen lagundu baitigute".
"Eredu berri baten bila aritu gara"
Eta eraldaketa hori, zioenez, "aurrekontua eta lantaldea handituta gertatu da noski. Asko da denbora honetan hitz egindakoa, hausnartutakoa, birpentsatutakoa eta gauzatutakoa. Eredu berri baten bila aritu gara". Bilaketa horretan aurkitutakoa azaldu zuen. "Laburrean esanda, egiten duguna beste modu batean egitean datza eraldaketak. Horrek guztiak gutako baikoitza, gizarte langile bakoitza bultzatu du aztertzera herritarrak gure bulegora etortzen direnean nola artatzen ditugun. Lantalde bezala ere horren inguruan hausnartu dugu, lan egiteko modu berriak esploratu ditugu; eta berriak gehitu", Salsamendiren esanetan.
Oroitarazi zuenez, ilusioz ekin zioten bide honi. "Ilusioz ekin genion duela urte batzuk eraldaketaren bideari eta argi genuen, modu honetako prozesu kolektibo bat modu arrakastatsuan aurrera eramatea posible nonbait izatekotan Usurbilen izango zela, oinarri komunitario sendoa duen herri batean. Asko ziren iritzi honetakoak eta horrela izan da". 
"Gure begiratzeko modua aldatu dugu"
Prozesu horri esker, "eskuhartzeak orain beste modu batera egiten ditugu, beste elementu batzuk gehitu ditugu. Gure begiratzeko modua aldatu dugu. Azken finean, lehendik egiten genuena hobetu dugu, aberastu dugu".
Gogorarazi eta aldarrikatu duenez, haien lana "ez da soilik zerbitzuak eskaintzea". Haratago doa, "gizarte langileon funtzioa bidelaguntza profesionala ematea da, pertsonaren nahiei erantzugo dion akonpainamendua eskaintzea, pertsona bere komunitatearekin etengabe konektatuz. Hori da gure xedea".
Ibilbide honetan emandako eraldaketa nagusia, horregatik, modu honetan definitu zuen gizarte zerbitzuen buruak. "Zerbitzuak eskaintzetik bizi-planak eskaintzera igaro gara".
Eskertza bidelagunei
Balantze gozoa egin du orain arte jorraturiko bideaz. "Lan ugari dago horren guztiaren atzean eta ez da beti erraza izan. Asko da ikasitakoa, baita desikasitakoa ere. Eta gustura gaude orain arte egindakoarekin". Bide horretan sakontzen segi nahi dute, "uste baitugu modu honetan aritzeak pertsonen bizitzak hobeak izateko bidean eragina baduela, zainduak edo zaintzailea izanda ere. Eta zer esanik ez, iraupen luzeko zaintzen beharra dagoenean. Egoera horietan ongizatea areagotzen duela dagoeneko demostratua baitago".
Eskertu egin nahi izan zituen bidelagunak, "urte hauetan rol ezberdinetatik eskuzabaltasunez zaintza eredu berri baten mesedetan zuen iritzia, denbora eta ekarpena egin duzuen guztiak. Eskerrik asko".