Udako aisialdi tartea antolatzen hasteko garaia heldu da. Atzora arte aurrematrikulatu zitekeen Ziortzaren udako kanpaldian edota Usurbilgo udalerria kide duen Udalerri Euskaldunen Mankomunitatearen (UEMA) Salto udaleku ibiltarietan.
Ekimen gehiago ere izango dira, halere, haur, gazte nahiz helduentzat, bidean datorren uda partean. Eskaintza horren berri eman du Usurbilgo Udalak. Batetik, Oiardo kiroldegian ikastaroak iragarri ditu uztaila osorako. "Ariketa fisikoa egitea sustatzeko helburuz, udaleko Kirol sailak zenbait ikastaro eskaini ohi ditu, uztailean: aretoko zein uretako ikastaroak daude aukeran, haur, gazte eta helduentzat prestatuak". Uztailaren 1ean hasi eta hilaren 30era arteko iraupena izango dute trebakuntza saioek. Uztailaren 2ko eta 25eko jaiegunetan ez da ikastarorik izango ezta haurrei zuzenduriko saiorik uztailaren 3an eta 4an, Usurbilgo festak tarteko.
Oiardo kiroldegiko eskaintzaren batera, Udajolas ere antolatu du Usurbilgo Udalak NOAUA! Kultur Elkartearekin batera. Gogoan izan, udalekuok 4-12 urte arteko haur eta gaztetxoei (HH3-LH6) zuzenduak daude. "Helburua herriko haurrei zein gazteei euskarazko aisialdi eskaintza egokia (hezitzailea eta baloreetan oinarritua) bermatzea da, euskararen normalizazioa bultzatzeko. Udalaren zerbitzua bada ere, Noaua kultur elkarteari esleitua dio kudeaketa".
Adi, aurten aldaketa izango da egutegi aldetik. Normalean, Usurbilgo festak amaitu eta biharamunean ematen zaio hasiera Udajolasi eta uztailaren 30ean amaitu izan ohi da. Aurten, aurreko urteetan baino lehenago abiaraziko da Udajolas; ekainaren 30ean. Bukatu, aldiz, orain arte bezala, uztailaren 30ean amaituko da. Baina 2025eko Usurbilgo jaiak, uztailaren 1etik 6ra ospatuko direnez, uztailaren 2tik 4ra ez da Udajolasik izango.
Udaleku hauei buruzko xehetasun gehiago ekainaren 17an jasoko dituzte izena emandako gaztetxoen gurasoek, arratsaldeko 17:00etan Sutegiko auditorioan.
Izen-ematea
Eskaintza batean zein bestean emateko epealdi bera finkatu du Usurbilgo Udalak. Oiardo kiroldegiko ikastaroetan nahiz Udajolasen apirilaren 3tik 16ra matrikulatu ahalko dute interesdunek, segidan dituzuen esteken bidez:
-Udajolasen izena emateko lotura: https://labur.eus/vuaxpbwe
-Ikastaroetan izena emateko lotura: https://labur.eus/r7x2fhkv
Usurbilgo Kirol Astea
Udako oporraldiaren aurretik, udaberrikoa datorkigu ate joka. Aurreko urteen antzera, Kirol Astea antolatu dute LH 3 eta 6 mailen arteko gaztetxoentzat Pagazpe Kirol Elkarteak eta Usurbil F.T.-k. Apirilaren 14tik 17ra, 10:00-13:00 artean izango da. Izena emateko epealdia apirilaren 6ra artekoa izango da. Helbide honetako formularioa osatu beharko da: https//forms.gle/XjNuVYPJgL8s7MmS9
Gaztelekua
Bertatik bi irteera antolatu dituzte datorren oporraldirako:
-Apirilak 12: "Conopy" (Igeldoko arborismoa) DBH2koentzat.
-Apirilak 14: Sendavivara irteera DBH1ekontzat.
Informazio gehiago:
gaztelekuausurbil@gmail.com
688 713 838