Eusko Jaurlaritzaren Hezkuntza Sailak proposamen eta bermerik ez duela eskaini adierazi dute sindikatuek. Honenbestez, apirilaren 1erako eta 2rako deituak zituzten greba egunei eustea erabaki dute unibertsitatez kanpoko hezkuntza publikoan, LAB, ELA, Steilas eta CCOO sindikatuek. "Azken momentuko mahai negoziatzaile batera deitu arren, Hezkuntza Sailak ez du bermerik eman hezkuntza sistema hobetuko luketen baliabideak jasotzeko. Horrenbestez, lanean jarraitzea dagokigu, ekarpenak eginez eta kaleak astinduz", berri eman du LAB sindikatuak.
ELA sindikatuak jakinarazi duenez, "pasa den astelehenetik Hezkuntza Sailak ez du proposamen berririk egin, ezta mahai negoziatzailerik deitu ere. Grebalarien aldarrikapenei erantzunik eman gabe, grebak deskonbokatzea beste asmorik ez du agertu".
Bart goizaldera arte luzatu dute negoziazio prozesua, baina ez da akordiorik erdietsi eta gaurko eta biharko, apirilaren 1erako eta 2rako deitutako greba egunei eustea erabaki dute sindikatuek. Inguruotako zenbait ikastetxeei eragingo die deialdiak; Aginagako eta Zubietako eskolei, Lanbide Eskolari edota Oriarteri.
"LABek Hezkuntza Sailaren jarrera salatu nahi du, grebaren bezperan arte proposamenik egin gabe eta modu desegokian negoziazioa luzatzen, beste behin, hezkuntza sistema hobetuko luketen neurrien gainetik greba eragozteko asmoa helburu izanda. Aurrez denbora soberan izan du bilerak deitu, eduki errealak mahai gainean jarri eta adostasunetara iristeko, baina epeak eta orduak luzatzea erabaki du, eta jarrera hori desegokia da ezein negoziaziotan, eta, kasu honetan, errespetu gutxikoa hezkuntza komunitatearekiko. Jarrera horren erakusle da bere azken proposamena atzo eguerdian helarazi izana sindikatuoi, aurrez hori aztertzeko inolako aukerarik eman gabe".
Manifestazioak deitu dituzte gaurko 11:30etan hiriburuetan. Donostiakoa Bulebarretik abiatuko da.
Hezkuntza publikoa greban gaur eta bihar
Apirilaren 1 eta 2rako iragarritako greba egunei eusteko asmoa agertu dute sindikatuek, negoziazioetan adostasunik ez da izan eta.