Lau egun besterik ez dira geratzen eta plazaratzeko gogoz eta prest dira jada irudiko protagonistak. Ikusmina sorrarazten dute urtero estreinatzen duten ikuskizunak, eta ez da gutxiagorako izango aurtengoan ere. "Amets" izena du eta Orbelditik aurreratu digutenez, hainbat edizioetan osagai nagusi izan duten umoretik zertxobait aldenduko dira oraingo honetan. Izan ere, aurtengoan, pertsona baten barne bidaia irudikatu nahi dute.
"Amets" emanaldiaren estreinaldi eguna apirilaren 5erako finkatua du Orbeldik, gaueko 22:00etan frontoian, Orbeldik antolaturiko 13. Dantza Egunaren amaieran. Halere, aurreko larunbatean, aurrestreinaldiaz gozatzeko aukera izan zen Agerialden. Bertan egin zuten azken entsegu saio orokorra eta ordukoa da albiste honi atxikitako talde argazkia. Orbeldik urtero eskaini nahi izaten die aukera ikuskizuna ezagutzekoa, estreinaldi egunera joan ezin dutenei.
Dagoeneko guztiz sustraitua den herri sorkuntza lan honen estreinaldiaz gain, izango ditu osagai gehiago, halere, 13. Dantza Egunak.
Dantza batean
Herria dantzan batera jartzera dator Orbeldi hamahirugarrenez. Apirileko lehen larunbatean izango da aurten, hilaren 5ean. Egun osorako jaialdia iragarri du herriko dantza taldeak; herritarren parte hartze zuzena sustatuko duena. Izan ere, ikusi eta entzun ahalko diren zenbait emanaldi iragarri dituzte; egunari ekiteko, lehenbizi, Dantzari Txiki ekimenaren seigarren edizioko kalejira eta jendaurreko erakustaldia eskainiko dute herriko dantzariek, hitzordura gonbidaturiko Zarauzko Jalgi eta Lezoko Murixka taldeekin batera.
Helduek hartuko dute haien lekukoa gauean, urtero moduan, herri sorkuntzaren erreferentziazko hitzorduarekin. Izan ere, azken hilabeteotan ondutako emanaldia aurkeztuko du Orbeldik; "Amets" izena du, 2025eko edizioan plazaratuko dutenak.
Ikuskizun horren aurretik eta haren ostean, indarra ahitu arte dantzan aritzeko aukera aparta izango da, erromeria giro beteko edizioa prestatu baitu Orbeldik aurtengorako. Hala, arratsaldean, Ostolaza eta Larrañaga trikitilariak arituko dira dantza giroa pizten Artzabalen. Gauean, Laket taldearekin segi ahalko da erromerian.
Usurbilgo 13. Dantza Eguna
Apirilak 5, larunbata
Goizean, 6. Dantzari Txiki: Jalgi eta Murixka talden gonbidatuekin:
11:30 Haurren kalejira udaletxetik.
13:00 Haurren emanaldia frontoian.
14:30 Herri bazkaria Askatasuna plazan.
17:00 Ostolaza eta Larrañaga trikitilariak Artzabalen.
22:00 "Amets" ikuskizuna frontoian.
Ondoren, Laket erromeria Mikel Laboa plazan.
Antolatzailea: Orbeldi dantza taldea.
