Aurrerago irekiko dute matrikulazio epea, jakinaraziko dituzte baita xehetasun gehiago ere. Momentuz, azken orduotan izenburua aurreratu dute, baita data ere. Udako Euskal Unibertsitateak Usurbilgo Udalarekin eta Jakinekin lankidetzan Usurbilen antolatu ohi duen UEU-ren udako ikastaroen baitako Jakin Jardunaldiaz ari gara.
53. edizioko udako ikastaroen eskaintza aurreratu du aipatu euskal unibertsitateak; tartean, Usurbilgo eskaintzarena, baita noiz egingo den ere. Garai batean uztailean antolatzen zuten, baina azken ediziotan ekainera aurreratu izan dute. Halaxe, izango da aurtengoa ere; ekainaren 19an eta 20an egingo da Jakin Jardunaldia. Honatx izenburua: "Kooperatibismo eraldatzailea, ekonomia soziala eta proiektu publiko-komunitario-kooperatiboak". Horrez gain, ekainaren 19rako saio hau ere antolatu dute: "Irizpide agroekologikoak definitu eta gizarteratzeko tresnak: Berme Sistema Parte-hartzaileak" izenekoa.
Izen-ematea maiatzean
Xehetasun hauek plazaratu arren, oraindik ezingo da matrikulatu 2025eko Jakin Jardunaldian. Maiatzaren 5ean irekiko dute horretarako epealdia, UEU-k ohartarazi duenez. Usurbilez gain, haientzat ohikoak diren lekuetan, alegia, Eibarren, Iruñean eta Baionan antolatu dituzte gainerako udako ikastaro eta jardunaldiak, baita Bilbon, Tolosan, Gasteizen eta Errenterian ere.
Denetariko edukiak txertatu dituzte eskaintza horretan; besteak beste, euskararen arnasguneak edota periferiak, gizarte ekonomiako euskal ikertzaileen topaketa edota filosofo euskaldunen bilkura, berrikuntza pedagogikoa, euskal literaturaren irakaskuntza, ikasle gorren hezkuntza, "gaur egungo gerra-zikloa eta desmilitarizaziorako bideak"... hartuko dituzte ahotan.
Ekainaren 11tik uztailaren 11ra arteko tartean egingo dira ia ikastaro eta jardunaldi guztiak, iraila hasieran ere saioren bat iragarri duten arren. UEU-ren udako eskaintza osoa, lotura honetan kontsultatu ahalko duzue: ueu.eus
Bederatzigarrena
2025eko ekainean egingo dena UEU-ren udako ikastaroen baitako bederatzigarren Jakin Jardunaldia izango da, Udako Euskal Unibertsitateak, Jakinek eta Usurbilgo Udalak izenpetua duten lankidetza hitzarmenari esker. 2017an adostu zuten estreinakoz hiru urterako lankidetza, gerora luzatzen joan direna. Ordutik hona, euskara, maitasun politikoa, pandemia, desazkundea, zaintza, gizarte mugimenduak edota memoria hizpide izan dituzte urteotan. Hona hemen 2017tik hona Jakin Jardunaldiok izandako izenburuak:
-2025: "Kooperatibismo eraldatzailea, ekonomia soziala eta proiektu publiko-komunitario-kooperatiboak".
-2024: "Gatazkaren memoria, memoriaren gatazka".
-2023: "Gizarte mugimenduak: erronka berriei elkargune berriak".
-2022: "EH2040: demografia, zaintza eta hizkuntza".
-2021: "Krisi ekologiko, klimatiko eta sozialaren erdian: desazkundea beste biderik bada?".
-2020: 'Pandemiak, distopiak eta mundu berriak'.
-2019: "Maitasuna politikoa da".
-2018: "Utopia 68/18: iruditeria berrien bila".
-2017: "Euskara, generoa, jatorria eta klasea gurutzatzen diren lekua".