2025ari begirako hitzorduei buruz atari honetan urtarrilean argitaratuko albiste batean jaso bezala, urtemugen urtea izango da honako hau. Usurbilgo Odol Emaileen Elkarteak mende erdia ospatu zuen duela bi hilabete. Azaroaz geroztik, 40. urtemugako ospakizun ziklo betean da Zumarte Musika Eskola eta haren adina du baita Ziortza Gazte Elkarteak ere. 40 urteko ibilbidea osatu du eta ospatzera doaz. "Aurtengo urtea berezia izango da, 1985ean sortu zen Ziortza Gazte Elkarteak 40 urte betetzen ditu!", gogorarazi zuten sare sozialen bidez.
Bagenekien maiatzean egingo ziotela gorazarre urteurren horri, baina azken orduotan gazte elkarteak berak aditzera eman duenez, data zehatza jarri diote berrogei urteen ospakizunari. Elkarteko gazteek eskuartean hartutako kartelekin iragarri dute, maiatzaren 23an eta 24an izango dela urtemuga festa. "Azkenik, iritsi da zuekin Ziortzaren 40. urteurren ospakizunaren data argitaratzeko eguna! Gogotsu gaude egun berezi hauek zuekin guztiekin ospatzeko", iragarri dute. Horregatik, "gorde egun hauek zuen agendetan", galdegin dute. Aipatu moduan, maiatzaren 23a eta 24a izango dira.
Gogoan izan, azkenaldian, Ziortzaren berri izan dugu, udako kanpaldirako aurre izen-ematea bideratu dutelako baita apirileko azken asteburuan Beizamako aterpetxean egingo duten elkarbizitza ere. Neguan zehar, haurrentzako euskarazko zine zikloa antolatzen lagundu dute Udalarekin batera. Urte hasieran erregeen kabalgata antolatu zuten baita. Horrez gain, Elkargunearen eraikuntza prozesuan parte hartzen ari dira.
Ekimen guztion, nahiz urtean zehar bideratzen duten dinamikan zehar, tarte bat hartu asmo dute maiatzaren 23an eta 24an, lau hamarkadako ibilbidea osatu zuen elkarteari gorazarre egiteko.
Ziortzak 40 urte
Ziortzak bere 40. urtemuga ospatzeko asteburua iragarri du
Bi egun finkatu ditu Ziortza Gazte Elkarteak bere 40. urtemuga ospatzeko.