Santuenea inguruetan ibili ziren azkenekoz tipi-tapa apirilaren 8an, "Goazen kalera, Usurbil" dinamikako parte hartzaileak. Oporraldia tarteko, asteotan ez da izan paseo osasuntsurik. Datorren hitzordua, astearte honetarako, maiatzaren 6rako dute finkatua herri erdigunean. 10:30etan abiatuko da ibilaldia frontoitik. Eguneko Arreta zerbitzutik igaroko da.
Gogoan izan, maiatzaren 27ra arteko eskaintza prestatu dute Usurbilgo Udalak, Udarregi ikastolak eta Aginagako zein Zubietako eskolek, Oinarrizko Lanbide Heziketarekin eta Arrate, Gure Pakea zein Gure Elkartea jubilatuen elkarteekin batera. Iaz bezala, txandakatu egingo dira ibilbideon eremuak. Bi astean behin Usurbilgo erdigunean egingo dira paseo hauek eta haietako batzuk Kalezarko zaintzadun etxebizitzen auzunetik edota Eguneko Arreta Zerbitzutik igaroko dira.
Kasu horietan, paseo amaierako hamaiketakoa gune horietan dastatuko dute parte hartzaileek. Gainerako astearteetan, Aginagan, Santuenean edota Zubietan egingo dira.
Ordutegiak ohikoa izaten segiko du; 10:30-12:00 artean egingo dira paseo hauek, tokian tokiko frontoitik. Amaitu berriz, Oinarrizko Lanbide Hastapeneko sukaldaritzako ikasleek prestaturiko hamaiketako gozoa dastatuz bukatuko dute irteera bakoitza.
Elkar zaintzea
Herri zaintzailegoa izateko bidean bere ekarpena egiten duen dinamika da honako hau. “Ariketa fisikoa egiteaz gainera, belaunaldi artekotasuna sustatzea eta elkarren arteko zaintza eta harremanak bultzatzea ditu helburu Goazen kalera, Usurbil ekimenak”, antolatzaileen esanetan.
Iaz berreskuratu zuten garai bateko egitasmo hau eta herri erdigunetik Usurbilgo txoko ezberdinetara hedatu zuten dinamika hau, tokian tokiko eskola eta jubilatuen elkarteekin lankidetzan. Momentuz, 2025ari begira, oraingoz hamahiru ibilaldi egingo dituzte maiatzaren 27ra arte.
“Goazen kalera, Usurbil”
Egutegia: otsailaren 4tik maiatzaren 27ra.
Noiz: asteartero.
Ordutegia: 10:30-12:00.
Abiapuntua: tokian tokiko frontoia.
Maiatza
6: Usurbilgo erdigunean. Eguneko Arretatik igaroko da.
13: Zubietan.
20: ekintza berezia Usurbilgo erdigunean. Ibilbidea ez da Egurtzegitik ezta Eguneko Arretatik pasako.
26: Aginagan.
