Ekaitz arriskuagatik abisu horian izango gara gaur, uztailaren 11n. Izan ere, Euskalmet meteorologia agentziak ohartarazi duenez, kolore horretako abisuaren eraginpean izango gara ostiral honetan, 18:00etan hasi eta gauerdira arte. Tarte horretan, "ordubetean 15 l/m² baino gehiago pila daitezke. Zaparrada ertainak eta trumoitsuak bota ditzake eta zenbait lekutan handiak izan daitezke". Izan ere, "zaparradekin batera txingorra (2-4 cm) egin dezake, haize-bolada gogorrak edo oso gogorrak izan daitezke (60-100 km/h) eta deskarga elektriko ugari egon daiteke", ohartarazten ari da Euskalmet.
Usurbilen mugakide diren Gipuzkoa barnealdeko udalerriak alerta laranjan izango dira. Kasu horietan, "ordubetean 30 l/m² baino gehiago pila daitezke. Zaparrada trumoitsu ertainak edo handiak bota ditzake eta barnealdeko zenbait lekutan oso handiak izan daitezke. Zaparradekin batera txingorra (2-4 cm) egin dezake, haize-bolada gogorrak edo oso gogorrak izan daitezke (60-100 km/h) eta deskarga elektriko ugari egon daiteke", ohartarazi du Euskalmet-ek.
Astebururako iragarpena
Giro honekin, ostiral honetan, hasteko, "goiz lanbroa" izango dugu Usurbilen. Aipatu meteorologia agentziaren arabera, "zerua hodei gutxirekin egongo da, arratsaldean bero-hodeiak ugaritu eta hodeitsu geratuko da. Egunaren bigarren zatian zaparrada trumoitsuak bota ditzake. Norabide aldakorreko haize ahula ibiliko da,arratsaldean ipar-ekialdetik finkatuko da; ahul, tarte biziren batekin. Tenperatura minimoak gutxi igoko dira eta maximoak gutxi jaitsiko dira".
Larunbatean segida izango du giro horrek. "Zaparrada trumoitsuak bota ditzake, bereziki goizaldean eta egunaren bigarren zatian. Mendebal-osagaiko haize ahul-bizia ibiliko da, bolada gogor batzuekin goizaldean. Tenperatura minimoetan aldaketarik ez. Tenperatura maximoak gutxi edo nahikoa jaitsiko dira", jakinarazi du Euskalmet-ek.
Hobetzera egingo du eguraldiak igandean, uztailaren 13an.
Informazio eguneratua euskalmet.eus bidez jaso ahalko duzue.
Prezipitazio handiagatik abisu horian izango gara ostiral arratsaldetik gauerdira. Usurbilen mugakideak diren Gipuzkoako barnealdeko udalerriak alerta laranjan izango dira.