Egurtzegiko bizi osorako etxebizitzak
Data esanguratsuak
-Uztailak 24: udalbatzaren osoko bilkura. Bertan, Egurtzegiko bizi osoko etxebizitzetara sartzeko irizpide eta baldintzei lotutako ordenantzaren hasierako onarpena bozkatuko dute.
-Hasieraz onartu ostean, jendaurreko epealdian jarriko dute.
-Iraila erdialdea: alegaziorik ez bada, aipatu udal ordenantza horri behin betiko onarpena ematea aurreikusia dute.
-Izen-ematea: iraila amaieran edo urria hasieran abiatzea aurreikusia dute. Izaera publikoko etxebizitzen gainerako esleipenetan bezalaxe, izen-emateen ostean, onarturiko eta bazterturiko eskaeren behin behineko zerrendak, gero haien alegazio tartea eta segidan, behin betiko zerrendak onartuko dira.
-Etxebizitza hauek esleituei emateko balizko data: 2025. urte amaiera-2026. urte hasiera.
Ezaugarriak
-Onuradunak:
1-1, 2 eta 3. graduko mendekotasuna duten eta 60 urte izatea edo betetzea eskaera egiten den urtean.
2- 1, 2 eta 3 graduko mendekotasuna izan eta %65eko desgaitasun aitortua duten 18-59 urte artekoak.
3-1, 2 eta 3 graduko mendekotasuna izan eta %75eko desgaitasun aitortua duten 18-59 urte artekoak.
-Lau etxebizitzetako bat, 18-59 urte artekoentzat gordetzea bermatu asmo dute. Halako eskaerarik ez balego, gainerako egoeran diren pertsonekin osatuko da.
-Errenta: bizikide guztien diru sarrerak hartuko dira kontuan errenta kalkulatzerakoan. Esleipendun bakoitzak ordaindu beharreko errentak ez du bizikidetza unitatearen sarreren %30a gaindituko. Kontsumo gastuak eta eremu komunetakoak errentarien kargu izango dira.
-Errolda: azken bi urteetan Usurbilen erroldatua egon edota azken 15 urteotan 8 urtez erroldatua egotea. Usurbil aldeko nahiz Donostia aldeko zubietar guztiek izango dute aukera esleipen deialdi honetan parte hartzekoa.
-Bizikidetza unitatea: gehienez 3 lagunekoak izango dira. Adinez nagusi diren kide guztiek titulartasun partekatua izango dute kontratuan. Zaintzaileek ez dute mendekotasun edo desgaitasun baldintzarik bete beharko.
-Alokairu kontratuaren iraupena: bost urtekoa izango da legeak finkatzen duen epealdia, urtero luzatu ahalko dena "harik eta alokairua, une bakoitzean indarrean dagoen errenta-legerian ezarritako gehiengo iraupena iritsi arte". Tarte horretan eta epealdi hori igarota ere, bertan bizi direnen egoerak zehaztuko du aurrera begirako bidea. Kontratuko epealdia amaitu eta luzapenik ez bada, maizterrak Udalaren esku jarriko du etxebizitza.
-Esleipen modua: udal gizarte zerbitzuen baremazio bidez erabakiko da. Kontuan hartuko dira eskatzaileen ordura arteko bizilekua, egoera pertsonala eta sozio-familiarra, parte hartze komunitarioa, mendekotasun maila, egoera ekonomikoa edota herrian duten errotzea.
Zenbat bizileku, noiz, nola, norentzat... izango diren zehaztua dute. Zehaztua dago, Usurbilgo herritarrentzat izango diren Egurtzegiko bizi osorako sei etxebizitzetatik lau esleitzeko prozedura modua. Udal ordenantza batek arautuko du guztia, aldaketarik ez bada, uztailaren 24an hasieraz onartuko duena udalbatzak. Datorren osoko bilkuran onartu asmo duten udal ordenantza horri buruzko hainbat xehetasun eskaini dituzte Usurbilgo Udalak eta Matiak, zaintza behar dutenak eta haien zaintzaileak elkarrekin bizitzen segitzea ahalbidetuko duten Egurtzegiko bizi osorako etxebizitzetara eginiko ostegun honetako bisita gidatuan. Segidan dituzue, laster bozkatu eta onartu asmo duten araudi horri buruzko hainbat zertzelada, baita aipatu etxebizitzok esleitzeko behin behineko egutegiari buruzko nondik norakoen berri ere.