Zenbaezinak dira bonben azpian Israelek erahildako palestinarrak eta ondoko kartelak argi adierazi bezalaxe, dena galtzeaz gain, gosez ere hiltzen ari direnak. Palestinarren egunerokoa da, etenik gabe okertzen eta larritzen doan eguneroko bizimodua.
Beste behin, eta "egoeraren larritasunaren aurrean", palestinarren aurkako genozidioa geratzea exijitzeko kazeroladak deitu ditu, azken urteotan beste hainbat mobilizazio eta dinamika antolatu izan dituen Gernika-Palestina Herri Ekimenak. Kazerolada hauek Euskal Herri osoan deitu ditu irailaren 5ean, arratsaldeko 19:00etan udaletxe atarietan "edo herri bakoitzean egoki ikusten duten tokietan". Herri eragile eta herritar oro deitu dute burrunba egitera, "genozidioa stop!" aldarridun mobilizazio hauetan parte hartzera.
Eragiteko unea
Palestinar herriaren aurkako genozidioaren krudeltzea salatu dute. Izan ere, palestinarrak bonba artean akabatzen jarraitzeaz gain, herri honen azpiegitura guztiak suntsitzearekin batera, palestinar herria gosez eta egarriz akabatzen ari da Israel.
Gernika-Palestina Herri Ekimenaren esanetan, Israel berehalako su-etena onartu eta Gazatik irtetera behartzeko unea da, negoziazio bidea irekitzekoa, laguntza humanitarioa sartzea ez eragoztekoa eta palestinarren gutxieneko bizi baldintza duinak bermatzekoa. Testuinguru aldaketa horretan, Europar Batasunak eta bertako kide diren herrialdeek Israelgo gobernuan eragiteko bitartekoak badituztela gogorarazi dute. Tokian tokiko erakundeak Israelekin harreman oro eten eta Israel isolatzera deitu dituzte.
