Arraun munduan inguruotan estimatuena den hitzordua ate joka dugu. Irailaren 3tik 14ra jokatuko da aurten Kontxako Bandera. Ekimenaren xehetasunak ostiral honetan, abuztuaren 29an aurkeztu ditu Donostiako Udalak; tartean, hitzordua iragarriko duen kartela. Herrikide batek, Joseba Larratxek sortutakoa da, albiste honi atxikia duzue.
"Itsaso handia" izena du bere sortze lanak. "Kartela ukipen-pantailako marrazki digitalaren teknikarekin eginda dago eta bertan, denboraren igaroa erakutsi nahi izan du artistak; zenbat denbora igaro den balezaleen garaitik gaur egunera arte; eta gaur egungo kirolariek ere itsaso izugarri eta errukigabe batean lehiatzen jarraitzen dutela. Era berean, hausnarketa bat ere planteatzen du: zer da handiagoa, arraunlarien ausardia ala itsasoa bera?".
Proben egutegia
Kontxako Bandera, hurrengo bi asteotan jokatuko da. Hona hemen, proben egutegia:
Irailak 3, asteazkena
18:00 Emakumezkoen sailkapen estropada. 21 traineru lehiatuko dira erlojuz kontra 1,5 miliako distantzian. Azkarren amaitzen duten zazpi talde sailkatuko dira Kontxako Banderarako, Donostiako Arraun Lagunak taldekoekin batera.
Irailak 4, osteguna
18:00 Gizonezkoen sailkapen estropada. 21 traineru lehiatuko dira erlojuz kontra 3 miliako distantzian. Azkarren amaitzen duten zazpi talde sailkatuko dira Kontxako Banderarako, Donostiako Arraun Lagunak taldekoekin batera.
Irailak 7 eta 14, igandeak
11:00 Emakumezkoen estropadak.
12:00 Gizonezkoen estropadak.
