Datorren astelehenean, irailaren lehenean irekitzekoak ziren partzialki Oiardo kiroldegia, asteazken iluntzean saunan izandako sutearen ondotik. Suak kaltetu gabeko eremuak behintzat ireki asmo zituzten, baina Usurbilgo Udalak ostiral honetan, abuztuaren 29an jakinarazi duenez, irekiera atzeratu egingo dute.
Izan ere, "erre usain handia dago eraikin guztian, eta ez dago kirola eroso egiteko baldintzarik". Testuinguru horretan, "garbiketa sakonagoa egitea" lehenetsi du Udalak. Ondorioz, ezingo dute Oiardo kiroldegia datorren astelehenean, irailaren 1ean ireki. "Lanean jarraituko dugu ahalik eta azkarren ireki ahal izateko, baldintza egokietan. Barkatu eragozpenak", berri eman du Udalak.
Sutea saunan
Gogoan izan, asteazken iluntzeko 21:10ak aldera sutea piztu zen saunan. "Kiroldegia itxita egonda, suteen aurkako alarmaren bidez bertaratu ziren suhiltzaileak kiroldegira: pare bat ordutan egoera kontrolpean izan bazuten ere, guztira lau ordu inguru izan ziren lanean", berri eman du Udalak.
Une horretan, itxita zegoen kiroldegia, honenbestez, ez zen kalte pertsonalik izan; bai, ordea, kalte materialak. "Kalte ugari sortu zituen suteak kiroldegiaren azpiegituretan, saunan eta igerilekuetan ez ezik, baita goiko solairuetan ere, batik bat, azken solairuko aldageletan. Gainerako espazioak, garbiketa behar badute ere, egoera onean daude, nahiz eta erre usaina nabaria den ia eraikin osoan", berri eman du udalak.
Kalteok konpontzeko lanak abian dira jada. Usurbilgo Udaletik azaldu dutenez, "argindarra berrezartzeko lanak eta garbiketa lanak martxan dira dagoeneko". Testinguru horretan, "perituek kalteak baloratu beharko dituzte; orduan jakingo da zenbaterainoko kaltea eragin duen", Udaletik ohartarazi dutenez.
Oraingoz, Udalaren asmoa, "gimnasioa, pista eta beheko aldagelak ahalik eta azkarren irekitzea da helburua; saunaren eta igerilekuaren kasuan, ordea, luze joko du". Ildo horretan, Udaletik iragarri dutenez, "kalteen balorazio zehatza egin arte, ezingo da argitu igerilekuko ikastaroekin zer gertatuko den".
Itxialdi honetan zehar, Udaletik gogorarazi dutenez, "erabiltzaileek Buruntzaldeko zein Kirol Txartela Mugiment sareko kiroldegiak erabili ahal izango dituzte".
Usurbilgo Udalak jakinarazi duenez, asteazkenean saunan izandako sutearen ondotik ez dute irailaren lehenean irekiko Oiardo kiroldegia, instalakuntza hauetan kirola egiteko baldintza egokiak bermatutakoan baizik.