Haizetsu amaituko dugu asteazken hau eta modu berean esnatuko zaigu ostegun goiza ere. Euskalmet meteorologia agentziak ohartarazi duenez, abisu horian izango gara haizeguneetan gaur iluntzeko 21:00etan hasi eta ostegun eguerdiko 12:00ak arte, "Benjamin" izena jarri eta gure artera heltzear den denboraleagatik. Asteazken iluntze honetan, "hego/hego-mendebaldeko haize-boladek 100 km/h-ko abiadura gain dezakete EAEko haizeguneetan, bereziki mendebaldeko eta hegoaldeko mendi inguruetan. Haizeguneak ez diren lekuetan haize-boladak 70-80 km/h ingurukoak izan daitezke".
Goizaldean haizearen norabidea aldatu daiteke baina indarrik galdu gabe, Euskalmet-en arabera. Gauerditik goizaldeko 6:00ak arte, "haizeguneetan, haize-boladek 100 km/h-ko abiadura gaindi dezakete. Hego-mendebaldeko haizeak mendebal/ipar-mendebaldera egingo du goizaldearen hasieran".
Gero, goizaldeko 6:00etan hasi eta eguerdiko 12:00ak arte, "mendebal/ipar-mendebaldeko haize-boladek 100 km/h-ko abiadura gaindi haizeguneetan, bereziki kostaldean eta kostaldetik gertu dauden mendietan. Haizeguneak ez diren lekuetan, kostaldetik gertu, boladak 80 km/h ingurukoak izan daitezke eta gainontzeko lekuetan 60-80 km/h ingurukoak".
Iragarpena
Giro horrekin, gaur, urriaren 22an Usurbilen, "zerua tarteka hodeitsu egongo da eta gauean oso hodeitsu. Noizbehinka euria egin dezake batez ere gauean. Hego-mendebaldeko haizea ibiliko da, bolada gogor eta oso gogorrekin; egunaren bukaeran indartu egingo da. Tenperaturan aldaketarik ez edo gutxi igoko da".
Ostegunean, hilaren 23an, "egunaren lehen zatian zerua oso hodeitsu egongo da eta euria edo zaparrada txiki-ertainak egingo ditu. Arratsaldean zerua tarteka hodeitsu egongo da eta baliteke noizean behin zaparradaren bat egitea. Hego-mendebaldeko haize ahul-bizia ibiliko da, bolada gogorrekin eta oso gogorrekin; goizaldean ipar-mendebaldera aldatuko da, bolada gogorrekin eta oso gogorrekin; arratsaldean indarra galduko du. Tenperatura gutxi edo nahikoa jaitsiko da; minimoak egunaren amaieran neurtuko dira eta maximoak goizaldean".
Ostiralean, hilaren 24an, "zerua tarteka hodeitsu egongo da, egunaren lehen zatian erdi mailako hodeiak eta goi-hodeiak nagusituko dira. Baliteke zaparrada txikiak egitea, bereziki goizaldean eta gauean. Goizaldean haizea hego-mendebaldetik finkatuko da, ahul-bizia, bolada gogor batzuekin; arratsaldean ipar eta ipar-mendebaldera aldatu eta ahul ibiliko da, tarte biziekin. Tenperatura minimoak nahikoa jaitsiko dira eta maximoetan aldaketarik ez edo gutxi jaitsiko dira".
Informazio eguneratua, euskalmet.eus bidez jaso ahalko duzue.
Haizeguneetan 100 kilometro ordutik gorako boladak izan daitezke, 70-80 kilometro ordutik gorakoak izan daitezke haizeguneak ez diren tokietan.