Udarregi ikastolako LH5eko ikasleek landutako proiektu baten aurkezpena ekarri digu aurtengo Booktegi jaialdiak. Izan ere, "Booktuber" izeneko egitasmoa ontzen aritu dira ikastolan, asteburu honetan ospaturiko ekimenaren aurretik. Literatura du ardatz ekimenak. Sutegiko auditorioan eginiko aurkezpen ekitaldian azaldu duten bezalaxe, "Booktuber izatea Youtuber" izatearen oso antzekoa da. Kasu honetan, liburuez hitz egiten dutenak dira. "Guk gure liburu gustukoak hartu, irakurri eta gero gure artean ideiak partekatu ditugu".
Ordura arteko lanketa ikus-entzunezko piezetan bilakatu dute, gogorarazi duten moduan, "Booktuber-ak gara" eta. Hala, azaldu dutenez, "azken urratsa izan da zailena baina baita dibertigarriena ere; gure gelakoak izan gara aktore, zuzendari eta kritikoak ere".
Izan ere, "gure proiektua oso argia da; irakurzaletasuna bultzatzea. Liburuak ate magikoak dira", nabarmendu dute. Horregatik, argi utzi dute, irakurtzea betebehar batetik haratago, oparitzat dutela.
"Literaturak pertsona hobeak egiten gaitu"
Leiho modukoa zabaldu nahi izan diete Sutegira joandakoei, literaturan murgil daitezen. "Ondo pasatzeko" bitartekoa izateaz gain, bere onurak nabarmendu dituzte. "Irakurtzeak burmuina indartzen du. Liburuek hiztegi aberatsa ematen digute, gozamena, zirrara. Hitz berri asko ikasten ditugu eta horrek esan nahi du adierazteko gai garela".
Emozioak ezagutu eta emozioetan hezteko bide ere badirela liburuak gogorarazi digute. "Irakurketari esker sentimendu asko ezagutzen ditugu; beldurra, tristura, poza eta horrek laguntzen digu pertsona enpatikoagoak izaten. Literaturak pertsona hobeak egiten gaitu".
Laburbildu nahi izan dutenez, "liburuak irudimena, hitzak eta bihotza lantzeko tresnak dira".
"Mundu berri bat deskubritzeko aukera"
Grabaturiko bideoak proiektatu aurretik, eskerrak helarazi dizkiete Sutegira joandakoei. Hantxe ziren, ikasleon, irakasle, senide eta lagunak. Haiei "eskerrak eman nahi dizkiegu laguntzeagatik" adierazi diete. "Bideo hauek grabatzerakoan oso ondo pasa dugu eta espero dugu zuek ere liburuak hartu eta mundu berri bat deskubritzeko aukera izatea".
Aurkezpen bidez eginiko ordura arteko lanketa, pantailaratu dute segidan, Sutegira joandakoen txalo artean.
Booktuber egitasmoa aurkeztu dute aurten, baina Udarregi ikastolak Booktegi jaialdia Usurbilen antolatzen hasi zirenetik denetariko ekarpenak egin dizkio hitzordu honi. Antzezten edo errezitatzen parte hartu du herri honetako belaunaldi gazteenak kontakizunaren jaialdian.
