Zenbait abisu hori indarrean izango dira egunotan, Euskalmet meteorologia agentziak ohartarazi duenez. Batetik, baso-sute arriskuagatik kolore horretako abisuaren eraginpean joango zaigu asteazken eta ostegun hau, azaroaren 12a eta 13a hurrenez hurren. "Baso-sute arriskua altua da Kantauri isurialdean hego-osagaiko haizearen intentsitateagatik", ohartarazi du Euskalmet-ek.
Bestalde, haizeagatik ere abisu horian izango gara bi egunotan. Haizeguneetan 100 kilometro ordutik gorako haize boladak izan ditzakegu mendi inguruetan; 60-90 artekoak hortik kanpo. Haizeguneak ez diren tokietan, asteazken eguerdiko 12:00ak arte, gero, arratsaldeko 18:00etan hasi eta ostegun goizeko 10:00ak arte, nahiz ostegun arratsaldeko 20:00etatik gauerdira, 80 kilometro ordutik gorako haize boladak izan ditzakegu.
Egunotarako iragarpena
Honenbestez, Euskalmet-en arabera gaur, azaroaren 12an, Usurbilen, "zerua hodei gutxirekin edo partez hodeitsu egongo da erdi mailako hodeiekin eta goi-hodeiekin. Hego/hego-ekialdeko haizea ahul-bizi ibiliko da, bolada gogorrekin eta oso gogorrekin. Tenperatura maximoak gutxi edo nahikoa igoko dira".
Ostegunean, hilaren 13an, "zerua tarteka hodeitsu egongo da; erdi mailako hodeiak eta goi-hodeiak nagusituko dira. Hego/hego-ekialdeko haize bizia ibiliko da, bolada gogorrekin. Tenperaturan aldaketarik ez edo gutxi igoko dira".
Ostiralean, hilaren 14an, "zerua hodeitsu egongo da, tarte oso hodeitsuekin; erdi mailako hodeiak eta goi-hodeiak nagusituko dira. Hego-osagaiko haize ahul-bizia ibiliko da, bolada gogorrekin, eta oso gogor batzuekin. Tenperatura gutxi edo nahikoa jaitsiko da".
Informazio eguneratua, euskalmet.eus bidez jaso ahalko duzue.
Abisu horian izango gara asteazken honetan, azaroaren 12an, haizeagatik eta baso-sute arriskuagatik. Abisuok ostegunera arte luzatu dituzte.