Urte amaierako eta 2026ko hasierako mobilizazioei begira egin du Usurbilgo Sarek hileroko azken ostiraleroko elkarretaratzea Mikel Laboa plazan, azaroaren 28ko iluntzean. "Urtean zeharreko dinamikak aurrera atera ditugularik, gainean dugu urte amaiera eta urteroko legez, gainean ditugu gabonetako mobilizazio zein urtarrileko manifestazio jendetsua ere", ekarri zuten gogora mobilizazioan zehar.
Aurretik, amaitzear dugun 2025. urte honi dagokion balantzea plazaratu zuten. "Urte oparoa izan dela esan dezakegu, etxeratze prozesua nahi genukeena baino mantsoago ari bada ere garatzen, aurrera urratsak nabarmenak izan direla esan dezakegu eta euskal preso, iheslari eta deportatu guztiak etxeratzearen helburua inoiz baino gertuago dugula baiezta dezakegu", ziurtatu zuten.
Bide horretan emandako aurrerapausoen "arrakasta euskal gizartearena da hein haundi batean", Sareren esanetan; "auzoz-auzo eta herriz-herri urte osoan zehar egindako mobilizazioen ondorio dira urrats horiek; "Puzzlea osatu arte" dinamikatik hasi eta udan zehar hondartzetako zein herri eta hirietako mobilizazioekin jarraituz. Urriaren 18an gauzatu genuen konferentzia ere gizarteak ondorioei behin betiko konponbidea emateko duen beharraren isla argia besterik ez da".
"Ezin da gehiago luzatu"
Hori, orain arte egindakoei buruz adierazi zutena bart Mikel Laboa plazako mobilizazioan. Urte hau agurtu eta 2026a abiarazteko hitzordu bana iragarri dute. "Aurrerantzean ere badugu ordea zer aldarrikatua. "Ezin da gehiago luzatu" lelopean, urtarrilean soilik ez eta abenduko azken ostiralaren bueltan Euskal Herriko ahalik eta auzo eta herri gehienetan mobilizatuko gara urteetako gatazkak utzitako ondorioen konponbideak ezin duela gehiago luzatu aldarrikatzeko", iragarri zuen Usurbilgo Sarek.
Deialdi horietan guztietan, "sufrimenduak ezin duela gehiago luzatu aldarrikatuko dugu, egiak, aitortzak eta erreparazioak ezin duela gehiago luzatu aldarrikatuko dugu, eta noski, konponbideak, bakeak eta elkarbizitzak ezin duela gehiago luzatu aldarrikatuko dugu. Aurtengo neguan ere argi erakutsi behar dugu Euskal Herriaren zati handiena prest dagoela ondorioak atzean utzi eta etorkizunari begira jartzeko. Prest baino, behar bat da gizartearentzat, iraganera iltzatzen gaituenarekin apurtu eta aurrera egiteko. Argi erakutsiko dugu beste behin, biolentzia ezberdinen biktimen aitortzarekin eta euskal preso, iheslari eta deportatuen etxeratze prozesuarekin eskuratuko ditugula elkarbizitza agertokiak. Helburu horretan berresten gara, eta abenduko zein urtarrileko mobilizazioetan bide horretan elkartu eta mobilizatuko gara", iragarri zuten.
Amaitzear dugun 2025eko balantzea plazaratu eta hurrengo mobilizazioak iragartzeko Sarek deitutako elkarretaratzea egin dute bart Mikel Laboa plazan.