24. Korrika badator! Gogoan izan, martxoaren 19an abiatuko da Zuberoako Atharratzetik eta hamar egun geroago, hilaren 29an helmugaratuko da Bizkaiako Bilbon. Tartean, 24 orduz, etenik gabe Euskal Herrian barrena (inguruotatik ere bai) ibiliko da euskararen aldeko lasterketa. Jada, musikatu dute; soinu-banda jarri diote ekimenari. Ostegun goiz honetan, abenduaren 11n sareratu dute 24. Korrikaren abesti ofiziala. Abestiari irudia ere jarri diote, bideokliparekin. Biak ala biak, albiste honi atxikitako bideoan dituzue.
Gogoan izan, ekimenari buruzko xehetasun gehiago jakinaraziak dituela AEK-k. Izan ere, duela hilabete aurkeztu zituen agerraldi bidez Gasteizen, non eta noiz hasi eta amaituko den: martxoaren 19an Atharratzen hasi eta hilaren 29an Bilbon amaituko da. Horrekin batera, aldarria ere plazaratu zuten; "Euskara Gara" izango da. Omendua, aldiz, Nafarroa erdialdea eta hegoaldea, bertan ekoitzitako produktuen otarren bidez laguntzen diharduen Errigora egitasmoa.
Postua San Tomas azokan
Horrekin batera, parte hartzen hasteko zenbait bide ere zabalik dituzte. Horien artean, Korrikak zabalik du dagoeneko sarean, materiala saltzeko denda. Hiriburuetako saltoki fisikoak ere prest ditu. Aipatzekoa, guneotan, besteak beste, salgai izango dituzuela petoak, nobedade batekin; segurtasun banda koloretsua izango dute gau partean ikusgarritasuna emateko.
Usurbilera etorrita, dagoeneko Usurbilgo Etumeta AEK euskaltegikoak hasi dira materiala saltzeko postua jartzen azken azoketan; eta halaxe egingo du baita, igande honetako, abenduaren 14ko San Tomas azokan.
24. Korrika
Iraupena: 2026ko martxoaren 19tik 29ra.
Aldarria: "Euskara gara".
Abiapuntua: Atharratzen, 2026ko martxoaren 19an.
Helmuga: Bilbon, 2026ko martxoaren 29an.
Mezua:
Euskara-herria naiz, bizitzeko era, izateko modua.
Suaren antzekoa naiz: beti bera, beti berri.
Ongi etorri nire etxera, gure etxera.
Iraganetik gaur egunera, ateak beti zabalik ditugun babesgunera.
Zu eta ni euskara gara. Bat gara.
Miloi bat euskaldun gara, eta gehiago izango gara.
Biziberritzen den komunitate aske eta irekia gara,
elkarrekin sortuko dugun etorkizuna.
Alderik alde zeharkatuko dugun Euskal Herria gara.
Eman hitza, eta eman pauso, erdigunean jartzeko aniztasuna eta elkar zaintzea.
Eman pausoa, eta aktibatu, lehen lerroan nahi dugu helduen euskalduntzea.
Guztiok gara ezinbesteko. Pertsona bakoitzak du balioa; hiztun bakoitzak, garrantzia.
Euskaltegian izena eman dugunok, euskara lehen hizkuntza dugunok, kanpotik etorri garenok,
euskaraz, Euskal Herrian, ikasi eta bizi nahi dugunok...
Guztiok herri bat gara. Euskara gara.
Aditu Korrikaren deiadarra.
Izan gaitezen dardara, izan gaitezen indarra.
Piztu da Korrikaren garra!…
Parte hartzeko bideak:
1-Herri batzordeetan parte hartuta.
2-Diru ekarpenak eginda:
-Korrika Laguntzaile izanda edota 24. Korrikaren materiala erosita.
-Korrikalarien peto edo bizkarrekoa erosita.
-Korrikaren kontu korronteotan diru ekarpenak eginda:
Hegoaldean: ES70 3035 0072 02 0720037810
Iparraldean: FR76 1333 5000 4008 9291 5827 532 (eurotan), 218371601 (euskotan).
-BIZUM edo txartel bidez "korrika" edo "aek" bilatuta, baita korrika.eus atariko "Nola parte hartu" atalean ere.
-Lekukoa eramanda senide edota lagunekin, elkartekideekin... dagokion ekarpena eginda.
3-Korrikaren berri eman eta haren ospea hedatuz:
-Korrika Kulturalaren ekitaldietan parte hartuta.
-Korrika.eus webgunea edota haren sare sozialetan parte hartuta.
4-Korrikan parte hartuta:
-Hasieran eta amaieran.
-Bizkarrekoa jantzita korrika eginez; "euskara ikasi, hitz egin eta euskaraz bizi nahi dugula erakusteko".
5-Enpresa eta saltokiek:
-24. Korrika iragartzeko euskarriak babestuta.
-Korrikalaria eskuratuz zein Korrika Lagun izanez.
-Kilometroak eskuratuz. Parte hartzeko modu hau erabili nahi dutenek Korrikaren bulegoetara jo dezakete.
Informazio gehiago:
korrika.eus
Antolatzailea: AEK.