Aspaldiko urteotako gabon gau eta eguberri egunik hotzenak datozkigu. Asteazken honetan, abenduaren 24an zehar, 7-9 gradu artean joango zaigu eguna. Gauean zehar, hozten segiko du eta ostegun goizaldean -2 graduko tenperatura izan dezakegu. Tarte horretan, elurra ere egin dezakeela ohartarazten ari da Euskalmet meteorologia agentzia. Halere, egitekotan askorik ez omen du egingo. "Elur-lapatsa egin badezake ere, zaila da zuritzea, prezipitazio askorik ez baita espero", Euskalmet-en arabera.
Abisu horia ezarri du aipatu agentziak asteazken gaueko 21:00etan hasi eta ostegun goizeko 9:00ak arte. Hamabi ordu horietan zehar, 700-900 metrotan zuritu dezake hasieran, baina gerora, goizaldean, "elur-kota baliteke 400-600 m inguruan egotea. Prezipitazio txikia egingo du han-hemenka, bereziki Kantauri isurialdean", Euskalmet-ek zehaztu duenez. Zentimetro bakar bateko elur geruza pila daiteke 600 metrotan.
Egunotarako iragarpena
Usurbilen, asteazken honetan, abenduaren 24an, "zerua estalita egongo da eta noizbehinka euria egin dezake, batez ere arratsalde-gau partean. Ipar-haizea ibiliko da, bolada gogorrekin. Tenperaturan aldaketarik ez edo gutxi jaitsiko da; minimoak azken orduetan neurtuko dira".
Ostegunean, hilaren 25ean, "egunaren hasieran zerua oso hodeitsu egongo da eta euria egin dezake; arratsalde-gau partean ostarteak zabalduko dira. Egunaren lehenengo partean ipar-haizea ibiliko da, arratsaldetik aurrera ekialdekoa. Tenperatura nahikoa jaitsiko da".
Ostirala ere hotzetik etorriko zaigu. Euskalmet-en arabera, hilaren 26an, "zerua tarteka hodeitsu egongo da. Hego-ekialdeko haizea ibiliko da. Tenperatura minimoetan aldaketarik ez edo gutxi jaitsiko dira. Tenperatura maximoak gutxi igoko dira".
Informazio eguneratua, euskalmet.eus bidez jaso ahalko duzue.
400 metrotan edo beherago egin dezake elurra ostegun goizaldean, baina iragarpenen arabera, askorik ez. Halere, abisu horia ezarri du Euskalmet meteorologia agentziak.