Asteburu erabakigarria, topaketa ere antolatu duen Usurbil K.E.-ren bi talderentzat

Taldeotako batek, jubenil mutilek igande goizeko 9:30etan Oiardon jokatuko dute, kadete mutilek, aldiz, bezperan, eguerdiko 12:00etan Hernanin.

"Bi taldeei berdinketak balio diote Gipuzkoako txapeldun izateko, hala eta guztiz ere, gure taldeak garaipenaren bila joango dira, bigarren fase honetako bolada onarekin jarraituz. Oraingoz, bai kadete mutilek eta baita jubenil mutilek ere bigarren fase honetan sei partidetatik sei irabazi dituzte".

Kadete mutilen entrenatzaile Jon Aizpuruak Usurbil K.E.-ren bidez adierazi duenez, "partida hau oso garrantzitsua da, baina jokalariak prest daude eta bakoitzak bere rola ondo beteko du, ziur nago. Helburua argia da: orain arteko jokoarekin eta jarrerarekin jarraitzea, bi puntuak Usurbilera ekartzeko eta Gipuzkoako txapeldun gelditzeko".

Jubenil mutilen entrenatzaile Julen Nazabalen esanetan, "kontzentrazio osoz jokatu behar dugu. Nahiz eta orain arte partida guztiak irabazi, igandean Urola aurkariak zail jarriko digu, hauek ere lehenengo postuaren aldeko borrokan baitaude. Taldeak denboraldia hasi zenetik honaino eman duen eboluzioa nabarmena da eta honi eutsi behar diogu, astean zehar egiten dugun lanari. Aurreko partidetan bezalaxe, urduritasuna alde batera utziz, gure jokoa egin beharko dugu Urolari irabazteko eta gure jokoa eginez gero, ez dut dudarik egiten partida irabaziko dugula".

Nazabal aipatu eskubaloi taldeen bilgunearen kirol arduraduna ere bada. Bere esanetan, "bi taldeak momentu onean daude, eta emaitza onek erakusten dute bi talde hauek egiten ari diren lana eta dedikazioa. Helburua argia da: kadete eta jubenil taldeak Gipuzkoako txapeldun gelditzea eta hurrengo astean jolastuko den promozio fasean, Euskal Ligara igotzeko txartela lortzea. Beraz, Usurbil Kirol Elkartetik deia gure jarraitzaile guztioi. Zuen laguntzarekin, animoekin, elkarrekin...lortuko dugulakoan. Gerturatu Hernaniko eta Usurbilgo kiroldegira!".