Abiatzear da NOAUA! Kultur Elkarteak hirugarren urtez segidan antolaturiko Kulturaldia. Urtarrilaren 24an hasi eta otsailaren 1era arte, askotariko sorkuntza diziplinak uztartuko ditu ziklo horrek.
Guztira bost hitzordu izango dira, haietako bat, udalerri hau kide duen Udalbiltza partzuergoaren Geuretik Sortuak egitasmoaren baitako antzezlana izango da. Horrez gain, errezitaldia, kontzertua, dokumental proiekzioa... programatu ditu kultur elkarte honek.
Ekitaldietarako sarrerak salgai dituzue usurbilkultura.eus plataforman, baita NOAUA! Kultur Elkartearen egoitzan ere. Adi, ordea, kultur elkarte honetako bazkide zaretenok merkeago eskuratu ahalko dituzue txartelak, kultur elkartearen egoitzan soilik.
Bazkidetza
NOAUA! kide izateak dakarren abantailetako bat duzue honako hau. Gogoan izan, kultur elkarte honetako bazkide izateko aukera duzue. Hartara, elkartearen erabakietan eskuhartzeko eskubidea izango duzue, beherapenak elkarte honek antolaturiko ekitaldietan, hobaria errenta aitorpenean, eta garrantzitsuena, egitasmo hau babestu eta bultzada emango diozue.
Bazkidetza kultur elkarteko egoitzan bideratu dezakezue, web orrialde honetan bertan, noaua.eus/bazkidetu/ atalean edota NOAUA! K.E.-ren egoitzan. Xehetasun gehiago bideotatik jaso ahalko duzue:
elkartea@noaua.eus
943 360 321
Bordaberri 3, behea
NOAUA! K.E.-ren Kulturaldia
Urtarrilak 24, larunbata
19:00 Dejabu antzerki konpainiaren "Itzulera" emanaldia Sutegiko auditorioan.
Zehaztasunak: "Arte eszenikoa eta zinematografikoa uztartzen dituen road movie bat da Itzulera, Dejabu konpainiaren azken sorkuntza.
Antzerki konpainia bateko hiru kidek Mexikora eginiko bidaia kontatzen du antzezlanak. Dokumental bat grabatzera joan dira krisi kreatiboan dauden hiru kideak, Etxepare Euskal Institutuak emandako dirulaguntza bati esker. Ezusteko gertakari batek zeharo aldatuko du bidaiaren norabidea.
Zuzenean sortutako film baten moduan eszenaratzen da lana. Hiru antzezleez gain, David Aguilar zinegilea dago oholtzan, zuzeneko irudien sorkuntza eta errealizazioan. Komedia existentzial honetan ez dira faltako abentura, paisaia psikodelikoak eta bizia salbatuko dien txakur chihuahua bat.
Esperientzia errepìkaezina da emanaldi bakoitza ikusleentzat, abenturaren parte baitira nolabait".
Sarrera: 10 eurotan, aldez aurretik usurbilkultura.eus plataforman nahiz NOAUA! K.E.-ren egoitzan. NOAUA! K.E.-ko bazkideek 8 eurotan, aldez aurretik, kultur elkartearen egoitzan.
Urtarrilak 25, igandea
18:00 “Lurdes Iriondo, ez gara alferrik pasako” dokumentala Sutegiko auditorioan.
Zuzendaria: Inge Mendioroz Ibañez.
Gidoigilea: Idoia Garzes Aldazabal.
Zehaztasunak: "Garai bateko zuri-beltzezko argazkietan izoztua gelditu den abeslari gaztea. Kapsulatua. Enkuadre baten barruan harrapatua, haren ahotsa diskoetan bezala. Ahaztuta, nonbait, ikuspuntua hautatu egiten dela. Ahaztuta, abeslaria izateaz gain, euskal kulturaren transmisioan ezinbesteko erreferentea ere badela Lurdes Iriondo. Transmisioarentzat haurrak ezinbesteko zirela ulertu zuen eta haientzat idatzi zituen liburuak eta antzerkiak".
Oharra: dokumentalaren proiekzioaren ostean, Inge Mendioroz Ibañez zuzendariarekin solasaldian aritzeko aukera izango dugu.
Sarrerak: 6 eurotan aldez aurretik, usurbilkultura.eus plataforman edo NOAUA! K.E.-ren egoitzan. Bazkideek aldez aurretik 4 eurotan, NOAUA! K.E.-ren egoitzan.
Urtarrilak 30, ostirala
20:00 Izaki Gardenak taldekoen kontzertua Sutegiko auditorioan.
Zuzeneko partaideak: Jon Basaguren: ahotsa, gitarra/Libe Kortazar: teklatuak, ahotsa/Joseba Baleztena: gitarra, ahotsa/Aitor Aguirre: baxua, ahotsa/Dani Arrizabalaga: bateria/Ander Sevilla: soinua/Beñat Gorroño: argiak.
Zehaztasunak: 2012an sortu zuen Jon Basaguren-ek Izaki Gardenak. Ordutik lau disko luze eta hainbat single plazaratu dituzte, indie-rocketik, americanatik eta bestelako estiloetatik edanez. Zer esaten den eta nola esaten den bereziki zaintzen dute, ahotsen doinuei, armoniei eta hitzei bereziki erreparatuz. Giro sotil eta lasaienetatik energia erauntsietara bidaiatzen iaioak dira, oinarri erritmiko sendo eta gitarra zein teklatuen ekarpen ederrekin.
30 kontzertutik gora eskaini dituzte 2025ean zehar. Gainera, disko berri berezi bat argitaratu dute abenduaren 2an: “Sitsak”. Bertan 4 kantu berri eta urteetan zehar diskoetatik kanpo argitaratzen joan diren beste 6 bilduko dituzte".
Sarrerak: 10 eurotan aldez aurretik usurbilkultura.eus plataforman edo NOAUA! K.E.-ren egoitzan eskuragarri. NOAUA! K.E.-ko bazkideek 8 eurotan eskuragarri kultur elkartearen egoitzan. 
Urtarrilak 31, larunbata
19:00 Ugaitz Agirreren "Bihotzeko fonoteka" ipuin kontaketa musikatua Sutegiko auditorioan.
Zehaztasunak: "Ugaitz Agirrek aurkeztuko digu bere Bihotzeko fonoteka, ipuin kontaketa musikatua. Zer da Bihotzeko fonoteka? Hasiera batean, literatur ariketa hutsa. Atzerriko abestien hitzak hartu, eta euskarara ekarri. Abestien kortsean erronka handia, alajaina. Baina ariketa hutsetik emanaldi egin da. Zortzi abesti, bihotzeko abesti, maitasunezko abesti, eta bakoitzak bere ipuintxoa. Maitasunaren ertzetan joan-etorrian: musu desiratuak, herdoildutako errutinak, ihes debekatuak, pozoiarekiko obsesioa".
Sarrerak: 6 eurotan usurbilkultura.eus webgunean edo NOAUA! K.E.-ren egoitzak eskuragarri. Bazkideek 4 eurotan eskuratu ahalko dituzte NOAUA! K.E.-ren egoitzan.
Otsailak 1, igandea
18:00 "Frankopoleon" antzezlana Sutegiko auditorioan.
Zehaztasunak: "2070. urtea. Frankopoleon estatu duala…
Zerk egiten gaitu euskaldun? Noren begiradapetik begiratu, mugatu, mututu, mutilatu edota depilatzen gaituzte? Zenbat hizkuntza hitz egiten ditugu euskaldunok? Zein euskara hitz egiten dugu? Nondik gatoz? Nola bukatuko dugu?".
Egileak: ·KULTURARTECO, belaunaldi desberdinetako hiru emakume sortzaile gara: Ekhiñe Famoso Intxaurrandieta, Inma Koiote eta Saioa Gomez Tejeria. Udalbiltzako Geuretik Sortuak ekimenari esker elkartu ginen 2024an. KulturArteCo.-ren helburua gure sormen lanak kulturartekotasunaren begiradatik eratzea da. Euskaraz bizi gara eta euskarei lekua ematen diegu".
Sarrerak: 3,5 eurotan, usurbilkultura.eus plataforman.
Antolatzaileak: Udalbiltza (Geuretik Sortuak), Usurbilgo Udala eta NOAUA! Kultur Elkartea.
Antolatzailea: NOAUA! K.E.
Laguntzailea: Usurbilgo Udala.