Gauerditik ostegun eguerdi honetara indarrean izandako abisu horia berriz jarriko dute indarrean ostiral eta larunbat honetan, otsailaren 13an eta 14an hurrenez hurren. Euskalmet meteorologia agentziak ohartarazi duenez, ostiral arratsaldeko 18:00etan hasi eta larunbat eguerdiko 12:00ak arte izango da indarrean haizeagatik. Haizeguneetan, "mendebal/ipar-mendebaldeko haize-boladak 100 kilometo ordu ingurukoak izan daitezke". Haizeguneak ez diren tokietan, aldiz, "60-80 kilometro orduko ingurukoak izan daitezke".
Giro honekin, ostegun honetan, otsailaren 12an, "zerua tarteka hodeitsu egongo da. Baliteke han-hemenka euri txikia egitea. Mendebaldeko haize bizia ibiliko da, bolada gogorrekin eta oso gogorrekin; eguerditik aurrera ahuldu egingo da eta arratsaldean hego-mendebaldera egin eta ahul-bizi ibiliko da, bolada gogorrekin. Tenperatura nahikoa jaitsiko da".
Ostiralean, hilaren 13an, "goizean hodeitza handituz joango da zerua oso hodeitsu edo estalita gelditu arte. Prezipitazio txiki-ertaina egingo du, sarriago eta ugariago egingo du egunaren bigarren partean. Egunaren amaieran trumoi-ekaitzak jo eta txingorra egin dezake. Hego-mendebaldeko haize ahul-bizia ibiliko da, bolada gogorrekin. Arratsaldean haizea ipar-mendebaldera aldatuko da ahul-bizi, bolada gogorrekin. Tenperatura nahikoa edo nabarmen jaitsiko da".
Larunbatean, hilaren 14an, "zerua oso hodeitsu edo estalita egongo da; egunaren amaieran ostarte batzuk zabalduko dira. Prezipitazio txiki-ertaina egingo du, sarriago egingo du eta ugariagoa izango da egunaren lehen partean; baliteke zenbait tokitan trumoitsuak izatea eta txingorra egitea. Arratsalde-gauean atertzeko joera hartuko du. Ipar-mendebaldeko haize ahul-bizia ibiliko da, bolada gogorrekin eta oso gogorrekin. Arratsaldetik aurrera indarra galduko du. Tenperatura nahikoa edo nabarmen jaitsiko da".
Informazio eguneratua euskalmet.eus bidez jaso ahalko duzue.
100 kilometro inguruko haize-boladak izan ditzakegu ostiralean eta larunbatean, otsailaren 13an eta 14an.