12 eta 16 urte bitarteko gazteek, aukera ederra izango dute Buruntzaldeko udalerrietan, hitzarekin eta musikarekin jolasteko eta trebatzeko, euskaraz. Izan ere, 'Beat-Eroak' rap tailerra antolatu dute eskualdeko udaletako Euskara Zerbitzuek, honako leloarekin: 'Hitza askatu, erritmoa markatu'.
Otsailean eta martxoan izango da tailerra, eta udalerri bakoitzean bina saio egingo dituzte. Usurbili dagokionean, lehenengoa gaurko dute programatua, otsailaren 23rako. Bertan, Odei Barroso rapero eta bertsolariarekin arituko dira gazteak, eta hitza landuko dute: oinarri musikala aukeratu, eta rap letrak lantzen lagunduko die Ødei artistak.
Kanta sortu eta grabatuko dute bigarren saioan
Tailerraren bigarren saioan, Ødei ez ezik, Telmo Trenor DJ eta ekoizlea ere izango da gazteekin, eta guztien artean emango diote forma egindako lanari: aukeratutako base musikalarekin eta osatutako letrekin, kanta sortu eta grabatuko dute. Martxoan izango da bigarren saio hori. Horrela, herri bakoitzean abesti bat osatuko dute, eta herrien arteko lehiaketa ere izango da: abesti guztiak entzungai jarriko dituzte euskara.buruntzaldea.eus webgunean, eta bozketa zabalduko dute, herritarrek gustukoen dutena aukeratzeko. Sari potoloa izango du irabazleak: bideoklipa grabatzea. Gainera, rap festa ere aurreikusi dute, egindako lanak erakutsi eta gazteen artean harremanak sustatzeko.
Herri bakoitzean, gehienez ere 30 gaztek hartu ahal izango dute parte.
Egitasmoa 2020 urtean jarri zuten martxan, Gipuzkoako Foru Aldundiko Gazteria Sailaren eta Iametzaren eskutik; eta bi proiektu pilotu egin zituzten: Legazpiko eta Urretxu-Zumarragako gaztelekuetan. Buruntzaldeko herrietako gazteen txanda da orain.
LEHENENGO SAIOA
Odei Barrosorekin, base musikala aukeratu eta rap letrak landuko dituzue.
GORDE ZURE EGUNA!
ANDOAIN Otsailak 19, osteguna
ASTIGARRAGA Otsailak 10, asteartea
HERNANI Otsailak 24, asteartea
LASARTE-ORIA Eguna zehazteke
URNIETA Otsailak 9, astelehena
USURBIL Otsailak 23, astelehena
BIGARREN SAIOA
Odei Barrosorekin eta Telmo Trenorrekin, kanta sortu eta bideoklipa egingo duzue.
GORDE ZURE EGUNA!
ANDOAIN Martxoak 26, osteguna
ASTIGARRAGA Martxoak 5, osteguna
HERNANI Martxoak 12, osteguna
LASARTE-ORIA Eguna zehazteke
URNIETA Martxoak 2, astelehena
USURBIL Martxoak 9, astelehena